Jóseph éí Jéíkab biyeʼ łaʼ akéeʼdiígíí jílı̨́. Hánaaí danilínígíí éí hazhéʼé aláahdi ayóóʼáhóʼníigo yaa ákodaniizı̨́ı̨́ʼ. Díí éí yikʼee haadaatʼéé ńtʼééʼ? Éí biniinaa dahojoołá. Jóseph éí tʼóó haa shı̨́ı̨́ yitʼéego nijiizyeelígíí hánaaí bee bił hojoolneʼ. Díí Jóseph bichʼįʼ yaa anídajiitʼįįhgo yaa nayiizyeelígíí éí níléí náasdi tʼáá ákódoonííł dazhniizı̨́ı̨́ʼ. Áko tʼóó tséʼédin dahojoołá daazlı̨́ı̨́ʼ!

Łah Jóseph bínaaí Shííkem kin haalʼá bíighahgi nidaʼniłkaad. Jéíkab éí Jóseph ákǫ́ǫ́ dínáahgo nínaaí baa nanítá, hałní. Tʼáá nízaadę́ę́ʼ joogáałgo hánaaí dahoołtsą́ągo ádaaní, ‘Aadę́ę́ʼ ashkii nayiiyeełí yigááł. Tįʼ dahodiyiilyéeł!’ Ałtsʼą́ą́ʼ dahasiłgo aʼáán góyaa adahwiisghan. Ndi Júdah náánáłaʼ hánaaí ání: ‘Doo dahodiyiilyééł da! Tįʼ nidahodiyiilnih.’ Áko Jóseph éí Mídiyan dineʼé léiʼ Ííjipgóó yikahgo naadiin béésh łigaii hą́ą́h azlı̨́įʼgo bichʼįʼ nahoʼdiizniiʼ.

Áádóó hánaaí tłʼízí dayiisxı̨́įgo bidił yę́ę haʼéétsoh yéédeistsooz. Haʼéétsoh yę́ę hazhéʼé beíltsooz, ‘Daʼ díísh niyeʼ biʼéétsoh átʼé?’ daaní. Áko Jéíkab éí hayeʼ naaldlooshii łaʼ hwiisxı̨́ı̨́ lá, jiniizı̨́ı̨́ʼ. Ayóó átʼéego yínííł jizlı̨́ı̨́ʼ.

Áádóó Ííjipdi, Féro bisiláo binanitʼaʼí Pátifer binaalteʼ jílı̨́įgo bichʼįʼ nahoʼdiizniiʼ. Ákondi Jóseph éí Jiihóvah bił hólǫ́. Pátifer éí Jóseph naanish nizhónígo ííłʼı̨́ índa baʼahódlíigo yaa ákoniizı̨́ı̨́ʼ. Áko Pátifer tʼáá ałtso daabíhígíí bá baa áhojilyą́ągo áhoolaa.

Ńtʼééʼ Pátifer beʼasdzą́ą́ éí Jóseph baa dzólníigo ayóó ázhnoolingo haa ákoniizı̨́ı̨́ʼ. Áko tʼáá ákwíí jı̨́ shił níteesh, hałní.  Jóseph haa doonííł? Doo íinízingóó ání; ‘Dooda! Doo álʼı̨́į da. Shinanitʼaʼí shaa dzólí, ní beʼasdzą́ą́ nílı̨́. Áko nił nétéezhgo éí Diyin God bichʼįʼ ádił adeesih!’

Nááná łah Pátifer beʼasdzą́ą́ shił níteesh hałníigo haatįįh yíyá. Haʼééʼ yąąh dah neeshjı̨́ı̨́d, áko Jóseph tłʼóóʼgóó chʼélwod. Pátifer hooghangi nádzáago, beʼasdzą́ą́ éí Jóseph shaatįįh yíyá níigo yił hólneʼ. Díí yoochʼííd átʼé. Áádóó Pátifer báhóóchįįdgo Jóseph awáalya góneʼ yah ayííłtʼeʼ. Ákondi Jiihóvah tʼáadoo haa yooznah da.