MUTU 14
Kapolo Amene Ankamvera Mulungu
Yosefe anali wachiwiri kwa mwana womaliza wa Yakobo. Azichimwene ake anaona kuti bambo awo ankamukonda kwambiri. Kodi ukuganiza kuti iwo anasangalala ndi zimenezi? Ayi. Ankamuchitira nsanje komanso ankadana naye. Pa nthawi ina Yosefe analota maloto odabwitsa. Atawauza azichimwene akewo, iwo anaganiza kuti malotowo akutanthauza kuti tsiku lina adzamugwadira. Izi zinangowonjezera chidani chija.
Pa nthawi ina azichimwene ake a Yosefe ankadyetsa ziweto pafupi ndi mzinda wotchedwa Sekemu. Ndiyeno Yakobo anatuma Yosefe kuti akawaone ngati ali bwino. Koma iwo atamuona akubwera anayamba kuuzana kuti: ‘Wolota uja suyo akubwera apoyo? Tiyeni timuphe.’ Atatero anamugwira n’kumuponyera m’chitsime chakuya. Koma mmodzi mwa azichimwene akewo dzina lake Yuda, anati: ‘Ayi tisamuphe. Tiyeni tingomugulitsa kuti akhale kapolo.’ Choncho anamugulitsa ndi ndalama zasiliva zokwana 20 kwa amalonda achimidiyani omwe ankapita ku Iguputo.
Kenako azichimwene akewo anatenga mkanjo wa Yosefe n’kuuviika m’magazi a mbuzi. Ndiyeno atafika kunyumba anapatsa bambo awo mkanjowo n’kunena kuti: ‘Kodi mkanjo uwu mungauzindikire? Kapena ndi wa Yosefe?’ Yakobo atauona, anaganiza kuti Yosefe wadyedwa ndi chilombo. Choncho anamva chisoni kwambiri n’kuyamba kulira ndipo sankatonthozeka.
Amalonda aja atafika ku Iguputo, anamugulitsa Yosefe kwa munthu wina waudindo dzina lake Potifara. Choncho Yosefe anali kapolo. Koma Yehova anali naye. Potifara anaona kuti Yosefe anali wolimbikira ntchito komanso wodalirika. Pasanapite nthawi anaikidwa kuti aziyang’anira zinthu zonse za Potifara.
Mkazi wa Potifara anaona kuti Yosefe anali wooneka bwino komanso wamphamvu. Tsiku lililonse ankamuuza kuti agone naye. Koma Yosefe ankakana ndipo anamuuza kuti: ‘Ayi, zimenezo si zabwino. Abwana anga amandikhulupirira ndipo inuyo ndinu mkazi wawo. Ndikagona nanu ndichimwira Mulungu.’
Tsiku lina mkazi wa Potifara anakakamizanso Yosefe kuti agone naye. Moti anamugwira malaya koma Yosefe anathawa. Potifara atabwera, mkaziyo ananama kuti Yosefe amafuna kumugwiririra. Choncho Potifara anakwiya kwambiri ndipo anaika Yosefe m’ndende. Koma Yehova sanamuiwale.
“Dzichepetseni pansi pa dzanja lamphamvu la Mulungu, kuti adzakukwezeni m’nthawi yake.”—1 Petulo 5:6
Mwina Mungakondenso Kudziwa Izi
ZITHUNZI ZOFOTOKOZA NKHANI ZA M’BAIBULO
Yosefe Ali ku Iguputo
Kodi mungasangalatse bwanji Mulungu ngakhale pamene anthu ena sakuona? Werengani nkhani ya m’Baibuloyi kuti muone chitsanzo cha Yosefe.
ZOTI MUCHITE POPHUNZIRA BAIBULO
Yosefe, Anaimbidwa Mlandu Womunamizira
Yosefe anaikidwa m’ndende pa mlandu womunamizira. Kodi n’chiyani chinamuthandiza kupirira?
ZITHUNZI ZOFOTOKOZA NKHANI ZA M’BAIBULO
Nkhani ya Ana a Yakobo
Kodi muyenera kutani ngati m’bale wanu kapena mnzanu wapeza chinthu chimene inuyo mumachifuna kwambiri?
ZITHUNZI
Yosefe Anagulitsidwa N’kukhala Kapolo
Koperani ndi kusindikiza chithunzichi ndipo pezani zinthu ziwiri zimene sizikugwirizana ndi nkhani ya m’Baibuloyi.
MAKADI A ANTHU OTCHULIDWA M’BAIBULO
Khadi la M’Baibulo Lonena za Yosefe
Werengani nkhaniyi kuti mudziwe chifukwa chake Farao anasankha Yosefe kukhala womutsatira m’dziko la Iguputo
MAKADI A ANTHU OTCHULIDWA M’BAIBULO
Khadi la M’Baibulo Lonena za Potifara
Koperani khadi la munthu wotchulidwa m’Baibuloli kuti mudziwe za Potifara, yemwe anali bwana wa Yosefe ku Iguputo.
