Yosefu akaba ari omwe ahari batabani ba Yakobo abato. Bakuru ba Yosefu bakareeba ngu ishe akaba naamukunda munonga. Nooteekateeka ngu bakeehurira bata? Bakagirira Yosefu eihari kandi baamwanga. Obu Yosefu yaatunga ebirooto, akagambiraho beene ishe. Bakateekateeka ngu ebirooto ebyo bikaba nibimanyisa ngu bakaba nibaija kumwinamira. Kuruga obwo bakamugirira rwango nyingi!

Eizooba rimwe bakuru ba Yosefu bakaba bariisize entaama haihi n’orurembo Shekemu. Yakobo akatuma Yosefu kuza kubareeba. Yosefu ku yaabaire akiri hare naija bakamureeba baagira bati: “Reeba ruroota yaija. Murekye tumwite.” Bakamukwata baamunaga omu kiina. Kwonka Yuda, omwe ahari bakuru be, akagira ati: ‘Mutamwita. Murekye tumuguze nk’omuhuuku.’ N’ahabw’ekyo bakaguza Yosefu Abamidiani abaabaire nibaruga Misri ebicweka 20 by’efeeza.

Bakuru ba Yosefu bakajabika ekanzu ye omu shagama y’embuzi, baagyoherereza ishebo, kandi baagira bati: ‘Ekanzu egi n’ey’omwana waawe?’ N’ahabw’ekyo Yakobo akateekateeka ngu enyamaishwa niyo eitsire Yosefu. Yakobo akagira enaku. Tihariho n’omwe owaabaire naabaasa kumuhuumuriza.

Omuri Misri, Yosefu bakamuguza nk’omuhuuku aha mukuru Potifaari. Kwonka Yehova akaba ari na Yosefu. Potifaari akareeba Yosefu naakora gye omurimo gwe kandi arikubaasa kwesigwa. Ahonaaho Potifaari akamuhindura omureeberezi ow’ebintu byona.

Muka Potifaari akareeba Yosefu ari murungi kandi aine amaani. Butoosha akaba agambira Yosefu ngu abyame nawe. Yosefu akaba naabaasa kukora ki? Akanga kandi yaagira ati: ‘Ngaaha. Eki ni kibi.  Mukama wangye naanyesiga, kandi iwe ori omukazi we. Naabyama naiwe, niinyija kucumura ahari Ruhanga.’

Eizooba rimwe muka Potifaari akateeraho kugyema Yosefu ngu abyame nawe. Akakwata ekijwaro kyonka, kwonka Yosefu akairuka. Potifaari ku yaagarukire omu ka, omukazi we akamugira ngu Yosefu yaaba naayenda kumuhamba. Akagamba ebishuba. Potifaari akagira ekiniga kingi, kandi yaata Yosefu omu kihome. Kwonka Yehova tareebirwe Yosefu.