Jacobqa churin Joseytam astawan kuyarqa, chaymi Jacobpa mayor churinkuna Joseyta chiqnirurqaku. Aswanraqmi Joseytaqa chiqnirurqaku musqukusqanmanta willaykuptin. Paykunaqa piensarqakum chay musqukusqanqa Joseypa qayllanpi huk punchaw kumuykunankuwan tupasqanta.

Huk punchawmi Joseypa wawqinkuna ovejata michichkarqaku, chaymi Jacobqa Joseyta kacharqa wawqinkunata qawamunanpaq. Wawqinkunañataqmi Joseyta karullamantaraq rikuruspanku nirqaku: “Waqaya musqukuq maqtaqa hamuchkan. ¡Wañurachisun!”, nispa. Chaymi llapankumanta hapiruspa uchkuman wischuykurqaku. Juda sutiyuq wawqinkuñataqmi nirqa: “Ama wañuchisunchu, aswanqa sirviente kananpaq rantikurusun”, nispa. Chaynapim Joseytaqa Egipto nacionman riq negociante Madian castakunaman 20 qullqillapaq rantikururqaku.

Hinaspam Joseypa pachanta cabrapa yawarninwan chapuruspanku taytankuman apaspa nirqaku: “¿Manachum kayqa churikipa pachan?”, nispa. Churinta purun animal tisaparusqanta piensaspanmi Jacobqa llumpayta waqarqa, manam pipas sunqun tiyachiyta atirqachu.

Chay negociantekunam Egipto nacionman chayaruspanku soldadokunapa capitannin Potifarman Joseytaqa rantikururqaku, chaynapi paypa sirvientenña kananpaq. Ichaqa Joseymi Jehova Dios yanapaptin allinkunata ruwaq, chaymi Potifarpas tukuy imankunamanta nanachikunanpaq churaykurqa.

Joseyqa karqa sumaq rikchayniyuq mozoñam, chayraykum Potifarpa warminqa paywan puñunanpaq sapa kuti hikutaq. Joseyñataqmi  mana munaspan nirqa: “Manam chaytaqa ruwaymanchu, qamqa kanki patronniypa warminmi, payqa allinpaqmi qawawan. Qanwan puñukuruspayqa Diostam qipancharuyman”, nispa.

Joseyqa Potifarpa warmin pachanmanta hapiruspan puñunanpaq hikutaptinmi chaylla lluptikurqa. Wasinman Potifar chayaruptinmi warminqa llullakuspan willakurqa Josey abusay munasqanmanta. Potifarñataqmi llumpayta piñakuruspan carcelman hinarachirqa, Jehova Diosmi ichaqa Joseyta yanaparqa.