Joseqa Jacobpa wawanmi karan. Anchatan papanqa payta munakuran, chayta reparaspan kuraq hermanonkuna envidiakuranku cheqnikuranku ima. Juj p’unchaymi Joseqa mosqokusqanta hermanonkunaman willaran. Mosqokusqanman jinaqa hermanonkunan payman k’umuykunanku karan. Chaywanmi astawanraq Joseta cheqnikuranku.

Juj p’unchaymi Josepa hermanonkunaqa Siquem (Shehem) llaqtaq qayllanpi ovejakunata michisharanku. Jinan Jacobqa Joseta kacharan imayna kashasqankuta yachamunanpaq. Joseta rikuspan hermanonkunaqa niranku: “Mosqokuq runan jamushan. ¡Wañurachisun!”, nispa. Joseta jap’ispanku jatun t’oqoman wijch’uykuranku. Judá ichaqa niran: “Ama wañuchisunchu. Aswanpas esclavo kananpaq venderapusun”, nispa. Jinan Madián runakunaman 20 qolqeman venderanku, chay runakunaqa Egipto llaqtamanmi risharanku.

Chay qhepamanmi hermanonkunaqa Josepa p’achanta cabraq yawarninwan llusiruranku, jinaspa papankuman apaspa tapuranku: “¿Manachu kayqa wawaykiq p’achan kashan?”, nispa. Jinan Jacobqa niran: “Juj phiña animalchá wawaytaqa mijurapun”, nispa. Chaymi sinchitapuni wawanmanta waqaran, manan pipas consolayta atiranchu.

Egiptopin Josetaqa Potifar oficialman venderanku. Diosmi ichaqa Josewan kasharan. Potifarqa repararanmi José allin llank’aq confianapaq jina kasqanta. Chaymi wasinpi tukuy cosasninkunamanta encargakunanpaq churaran.

 Potifarpa esposanmi rikuran José kallpasapa munay rijch’ayniyoq kasqanta, chaymi sapa kutilla niran paywan puñunanpaq. ¿Imatan José ruwaran? Niranmi: “Manan chaytaqa ruwaymanchu, chayqa manan allinchu. Patronniyqa noqapin confian, paypa esposanmi kanki. Qanwan puñuqtiyqa Dios contrachá juchallikuyman”, nispa.

Juj p’unchaymi Potifarpa esposanqa Joseta p’achanmanta jap’ispa obligaran paywan puñunanpaq, Josemi ichaqa ayqekuran. Potifar wasinman jamuqtinmi warminqa llullakuspa niran: “Josemi dañota ruwayta munawaran”, nispa. Jinan Potifarqa sinchita phiñakuspa carcelpi wisq’achimuran. Jehová Diosmi ichaqa Joseta mana qonqaranchu.