Joseca Jacobpa casi último churimi carca. Jacob paipa churi Joseta ashtahuan juyashcata cuenta japishpaca, paipa rucu huauquicunaca ¿imashinashi sintirishcanga? Na ricunayachinllu carca. Envidiashpami ricun carca. Shuj punllaca Joseca shuj muscuita charishpami paipa huauquicunaman villarca. Chaita uyashpami Josepa huauquicunaca yuyarca, paipa ñaupajpi cungurishpa canatachu nijun nishpa. Chaimi paicunaca Josetaca ashtahuan na ricunayachirca.

Shuj punllaca Josepa huauquicunaca Siquem llacta ladollapi michinajurca. Chaimandami Jacobca paipa churi Joseta paicunata ricuchun cacharca. Josepa huauquicuna José caruta shamujujta ricushpami cashna ninajurca: “Ricuichi, muscushpa causajca shamujunmi”. Cunanga paita huañuchishunchi nishpa. Chaimandami Joseta japishpa shuj jatun utujupi shitarca. Chaita ricushpami Judá runaca paipa huauquicunata nirca: Ama huañuchichu, esclavo shina jatushpa cachashunchi nishpa. Judá nishcata uyashpami, randishpa, jatushpa purij madianitacuna Egiptoman yalinajujpi Josetaca esclavotashna, ishcai chunga culquipa jatushpa cacharca.

Jipamanga Josepa huauquicunaca paipa jahualla churajunata japishpami, shuj animalta huañuchishpa chai yahuarpi satirca. Chai jipaca Jacobman Josepa churajunata apashpami cashna tapunajurca: “Caitami tarircanchi. ¿Cambaj churipaj churajunachu?” nishpa. Chaita ricushpami, ‘paitaca imapash millai animalmi huañuchishcanga nijurca’. Chaimandami Jacobca llaqui llaqui carca. Paitaca ni pipash na cushichita usharcachu.

Madianitacuna Josehuan Egipto llactaman chayajpica, Faraonda sirvij Potifar runami Josetaca paipa esclavo cachun randirca. Shinapash Jehová Diosca siempremi Joseta cuidarca. Potifarca José alipacha trabajador cajta, paipi confiai ushashcatami cuenta japirca. Asha tiempo jipaca pai tucui ima charishcacunata José ricuchunmi mingarca.

Potifarpa huarmica José juyailla, shinlli cajta ricushpami cutin cutin ñucahuan puñushun nijurca. Shina nijujpica Joseca ¿imatata rurarca? Joseca nimamanda na chai huarmitaca uyarcachu. Chaimi cashna nirca:‘Ricui, ñuca amoca tucui imatalla pai  charishcatapash, ñuca maquipimi saquishca’. Quiquinga paipa huarmimi cangui. “Shina cashpaca, ¿imashpata ñucaca cai jatun nalita rurashpa juchata rurashpa, Taita Diosta fiñachishayari?” nishpa.

Shuj punllaca, Potifarpa huarmica Josetaca paipa ropamanda aisashpami paihuan puñuchun nishpa obligangapaj munarca. Shina nijujpimi Joseca calpashpa llujshirca. Shinapash Potifar huasiman chayajpica chai huarmica llullashpami nirca: Josemi paihuan puñuchun obligangapaj munahuarca nishpa. Chaita uyashpami Potifarca ninanda culirashpa Josetaca carcelpi vicharca. Shinapash Jehová Diosca Josetaca siempremi cuidarca.