O Jakov dobindža e Josife ked već phurilo hem odoljese manglja lje najviše ando sa o čhave. Sar e Josifese phuredera phralja osetindže pe ked dikhlje odova? On hine ljubomorna upro ljeste hem mrzindže lje. Jekh puti, o Josif vačerdža pe phraljendže save čudna sune dikhlja. On mislindže so akala sune značinena so jekh dive on ka pokloninen pe oljese. Odoljese, on mrzindže lje pana pobuter!

Jekh dive, e Josifese phralja arakhlje e bakren paše uzi diz Sihem. O Jakov bičhaldža e Josife te dikhel da li tane šukar. Ked dikhlje lje dural sar avela, phendže: „Ače, avela akava so dikhela sune, hajde te mudara lje!“ Ked alo, doljindže lje hem fordindže lje ki jekh hor rupa. Ama, o Juda, jekh ando oljese phralja, phendža: „Ma mudaren lje, pošukar te bikna lje sar robo.“ Adžahar bikindže lje aso 20 srebrnikija disave trgovcijendže ando Madijan kola podžindže ko Egipat.

Palo odova, e Josifese phralja topindže oljese šeja ko e buznjako rat, bičhaldže ljen oljenge dadese hem phendže: „Nane li akala te čhavese šeja?“ O Jakov mislindža so disavi divljo životinja mudardža e Josife. Odoljese hine but tužno. Niko naštindža te utešini lje.

Ko Egipat, o Josif hine bikimo sar robo jekhe važno manušese kova vičindža pe Petefrije. Ama, o Jehova hem ponodri hine e Josifeja. O Petefrije dikhlja so o Josif šukar čerela pi buti hem so šaj te verujini ljese. Hari palo odova, ov čhivdža lje te ovel glavno manuš upro sa so hine lje.

E Petefrijesi romni dikhlja so o Josif hine šužo hem zoralo. Svako dive pučlja e Josife te sovel olaja. So o Josif čerdža?  Ov odbindža la hem phendža: „Na! Odova nane šukar. Mo gospodari isi lje poverenje koro mande, a tu hijan oljesi romni. Ako sovava tuvaja, ka grešinav e Devljese!“

Jekh dive, e Petefrijesi romni probindža silaja te čhivel e Josife te sovel olaja. Doljindža lje ando šeja, ama ov našlja. Ked o Petefrije alo čhere, oj vačerdža ljese so o Josif napadindža la. Ama, odova na hine čače. O Petefrije hine but holjamo hem naredindža te phanen e Josife. Ama, o Jehova na bisterdža e Josife.