О Иосифо сас май цыкнэдэр анда ԥрала, савэ лэ Иаковостирэ шавэ. Лэ Иосифостирэ барэдэр ԥрала диқэнас, кай лэнго дад май фартэ любий лэ Иосифос, чем лэн. Сар ту гиндос, со лэндэ сас по ди? Вонэ вороӷуинас и холявэнас пэр лэстэ. Еқвар о Иосифо диқля на сԥэнэса савэ сунэ, во росԥэндя пала лэндэ лэ ԥралэнди. Андэ кадэла сунэ во диқля, кай лэстирэ ԥрала авелэ и тэлелэ лэсти. Кала и ԥрала када ашундэ, вонэ инке май фартэ шутэ вэрыцыя пэр лэстэ!

Еқвар лэ Иосифостирэ ԥрала пасынас лэ бакрэн паша форо Сихемо. О Иаково мангля лэ Иосифос тэ жал тэ диқэл, сар вонэ котэ. Сар и ԥрала додиқлэ лэ Иосифос, вонэ ԥэндэ: «Диқэн, ко жал! Кодэва, ко диқэл и сунэ. Умараса лэс!» Вонэ хутилдэ лэ Иосифос и шутэ андэ бари хаинг, кай на сас паи. Но о Иуда ԥэндя: «На умарэн лэс! Фэдэр битинаса лэс». И ԥрала битиндэ лэ Иосифос пала двадцать рупунэ сикли. Лэс битиндэ манушэнди, савэ тинэн и битинэн. Кадэла мануша слинэ мадианитяноря, савэ жанас андо Египто.

И ԥрала зашындэ лэ бузнэс и вимақлэ лэ Иосифости йда андо рат. Тоди вонэ кадэя йда андярдэ пэстирэ дадэсти и пушлэ: «Када най тирэ шавэсти йда?» О Иаково гиндосардя, кай лэ Иосифос росхаля о дыко зверё. Када важ лэстэ сас бари бида! Лэсти сас фартэ ԥарэс. И кадэва ԥаримос нико нащи улэлас лэстар па оди.

Андо Египто лэ Иосифос битиндэ барэ манушэсти, савэс ақарэнас Потифаро. Но о Иегова на ашадя лэ Иосифос. О Потифаро диқля, кай о Иосифо драго терэл бути и лэсти можно тэ патяс. Прожыля набут время о Потифаро стодя лэ Иосифос тэ диқэл пала вся лэско хабэ.

 Лэ Потифарости хулаи диқля, кай о Иосифо шукарно и зорало. Дес десэстар вой мангэлас, кай во тэ пэрэл ласа. Сар о Иосифо андярэлас пэс? Во састэс ԥэнэнас лати: «Кадя нащи, када найдраго! О хулай лэ цэрэско патял манди, ай ту лэсти хулаи. Мэ стерава бэзэх англа Дэл, сар пэрава туса!»

Еқвар лэ Потифарости хулаи нахально цырдэлас лэ Иосифос каринг пэстэ. Вой хутилдя лэс пала йда, но во вишынделя и унашля. Кала о Потифаро авеля цэрэ, вой ԥэндя, кай о Иосифо камля ласа нахально тэ пэрэсовэл. Када сас хохаимос. О Потифаро фартэ холяйля и шутя лэ Иосифос андо баруно. Но о Иегова на бистэрдя пала Иосифо.