Yaiqoobite maaˈnuulle ooso giddo mittu Yooseefiiti. Bayiruuddu roduuwisi, anninsa Yaiqoobi Yooseefi lowo geeshsha baxannota affu. Yooseefi roduuwisi ma assitinoro afootto? Insa iso hinaassino; hattono gibbinosi. Mitte hige Yooseefi haaqee haaqiiˈre, hattee roduuwisira kuli. Tini haaqee insa Yooseefira kumbuultannota leellishshannote. Konni daafira insa iso albinni roore gibbu!

Mitto barra Yooseefi roduuwi Sekeemi yinanni katami mule geˈreewo allaaˈlitara hadhu. Hakkiinni anninsa Yaiqoobi roduuwasi laˈˈara Yooseefi hakkiira soyi. Insa xeertote heedhe rodiinsa Yooseefi daanna laˈu; hakkiinni mimmitoho, ‘Hakku haaqiiˈraanchu kuuee dayino; amme shinona’ yitu. Hakkiinni insa iso amadde balete tuggu. Yooseefi rodii Yihuda kayinni, ‘Rodoonke shaa agurre borojjicho assine hirro’ yii. Konni daafira iso Gibitsete gobba hadhanni noorira Ismaeelete daddalaasinera 20 birrira hirtino.

Yooseefi roduuwi uddanosi haadhe meichu goco gorrite mundeete giddo worte fushshitu; hakkiinni anninsara massite ‘Tini dibeettikki uddanooti?’ yitu. Konni daafira Yaiqoobira Yooseefi moyichu itinoha lawisi. Isi lowo geeshsha dadillino. Mittu manchino Yaiqoobi sheshifachisha didandiino.

Yooseefi Gibitsete gobbara Phoxifaari yinanni manchira borojjicho assine hirroonni; Phoxifaari, Feriooni yinanniha Gibitsete gobba moote agaranno manni roorrichaati. Yihowa kayinni Yooseefi ledo no. Phoxifaari Yooseefi looso dancha gede asse loosannohanna ammanaminoha ikkinota afi. Konni daafira Phoxifaari noosire baala Yooseefi anga wori.

Phoxifaari galte Yooseefi xumanna worba ikkinota huwattu. Ise barru baala Yooseefi ledose goxanno gede huuccitanni qarrissusi. Yooseefi maa assiyya? Isi togo yiinose: ‘Dihasiˈreemmo, kuni busha coyeeti.  Mootichiˈya ane ammanannoe, ati isi galteeti. Ani ledokki goxummoro Maganu albaanni cubbo looseemmo!’

Mitto barra Phoxifaari galte Yooseefi ledose fooranno gede giddeessate woˈnaaltu. Ise uddanosi cuˈmite amaddu, Yooseefi kayinni xooqe bai. Phoxifaari minira dayita galtesi, ‘Yooseefi shollishe hooginoe’ yite kuˈlitu. Ise hatto yaase kaphoho. Phoxifaari lowo geeshsha hanqe Yooseefi usuru minira eessi. Yihowa kayinni Yooseefi dihawino.