ዮሴፍ ሓደ ኻብቶም ንኣሽቱ ደቂ ያእቆብ እዩ ነይሩ። ዓበይቲ ኣሕዋቱ፡ ኣቦኦም ንዮሴፍ ብዝያዳ ኸም ዝፈትዎ ረኣዩ። ብዛዕባ እዚ እሞ ኸመይ እተሰምዖም ይመስለካ፧ ንዮሴፍ ቀንኡሉ፡ ጸልእዎ እውን። ዮሴፍ ፍልይ ዝበለ ሕልምታት ምስ ሓለመ፡ ንኣሕዋቱ ብዛዕባኡ ነገሮም። እቲ ሕልምታት፡ ሓደ መዓልቲ ንዕኡ ኸም ዚሰግዱሉ ዜመልክት መሰሎም። ድሕርዚ ኸኣ፡ ብዝያዳ ጸልእዎ።

ሓደ መዓልቲ፡ ኣሕዋት ዮሴፍ ኣብ ጥቓ ኸተማ ሴኬም ኣባጊዕ ይጓስዩ ነበሩ። ያእቆብ ድማ ንዮሴፍ፡ ኣሕዋቱ ኸመይ ከም ዘለዉ ኺርኢ ሰደዶ። ንሳቶም ከኣ ዮሴፍ ኪመጽእ ከሎ ኻብ ርሑቕ ረኣይዎ እሞ፡ ‘እቲ ሓላሚ ይመጽእ ኣሎ። ንቕተሎ!’ ተባሃሃሉ። ሒዞም ከኣ ኣብ ዓሚቝ ጕድጓድ ደርበይዎ። ሓደ ኻብቶም ኣሕዋቱ ዝዀነ ይሁዳ ግና፡ ‘ኣይንቕተሎ። ባርያ ኪኸውን ንሽጦ’ በሎም። ስለዚ፡ ንዮሴፍ ብ20 ብሩር ናብ ግብጺ ንዚኸዱ ዝነበሩ ሚድያናውያን ነጋዶ ሸጥዎ።

ድሕሪኡ፡ ኣሕዋት ዮሴፍ ነቲ ኽዳኑ ኣብ ደም ወጠጦ ኣለኽዎ እሞ፡ ናብ ኣቦኦም ሰዲዶም፡ ‘እዝስ ክዳን ወድኻ ደይኰነን፧’ በልዎ። ያእቆብ ከኣ፡ ዮሴፍ ብኣራዊት እተበልዐ ስለ ዝመሰሎ፡ ብዙሕ ሓዘነ። ዋላ ሓደ ኼጸናንዖ ኣይከኣለን።

ኣብ ግብጺ ድማ፡ ዮሴፍ ንሓደ ጶጢፋር ዚብሃል ልዑል ብዓል ስልጣን ባርያኡ ኪኸውን ተሸጠ። የሆዋ ግና ምስ ዮሴፍ ነበረ። ጶጢፋር ከኣ፡ ዮሴፍ ንፉዕ ሰራሕተኛን እሙንን ምዃኑ ረኣየ። ስለዚ፡ ጶጢፋር ነዊሕ ከይጸንሐ ኣብ ልዕሊ ዅሉ ንብረቱ ሓላፍነት ሃቦ።

ሰበይቲ ጶጢፋር ድማ፡ ዮሴፍ መልክዐኛን ድልዱልን ምዃኑ ረኣየት። መዓልቲ መዓልቲ ኸኣ ንዮሴፍ ምስኣ ኺድቅስ ትሓትቶ ነበረት። እሞኸ ዮሴፍ እንታይ ገበረ፧ ‘ከምኡ ምግባር ጌጋ እዩ። ጐይታይ ይኣምነኒ እዩ፣ ንስኺ ድማ ሰበይቱ ኢኺ። ምሳኺ እንተ ደቂሰ፡ ኣብ ቅድሚ ኣምላኽ ሓጢኣት ክገብር እየ’ ኢሉ ኣበያ።

 ሓደ መዓልቲ፡ ሰበይቲ ጶጢፋር ንዮሴፍ ምስኣ ኺድቅስ ክትግድዶ ፈተነት። ክዳኑ እውን ኣጽኒዓ ሓዘት፣ ንሱ ግና ሃደመ። ጶጢፋር ናብ ቤቱ ምስ ተመልሰ፡ ዮሴፍ ከም ዘጥቀዓ ገይራ ነገረቶ። ሓስያ እያ ኸምኡ ኢላ። ጶጢፋር ከኣ ኣዝዩ ተቘጥዐ፣ ንዮሴፍ እውን ናብ ቤት ማእሰርቲ ደርበዮ። የሆዋ ግና ንዮሴፍ ፈጺሙ ኣይረስዖን።