Yosefe wenga yumoza mwa ŵana akukumaliya aku Yakobe. Aku ŵaki awonanga kuti awisewu ayanjanga ukongwa Yosefe kuluska yiwu. Kumbi uwona kuti yiwu avwanga wuli? Angwamba kumuchitiya sanji. Pavuli paki, Yosefe wangulota malotu ngo wenga wechendalotepu. Wati wakambiya aku ŵaki malotu yanga, yiwu aŵanaŵananga kuti malotu ngo ngang’anamuwanga kuti zuŵa linyaki azakumugwadiya. Mwaviyo, angumutinkha ukongwa kuluska kali!

Zuŵa linyaki aku ŵaki aku Yosefe, anguluta kuchiliska mbereri pafupi ndi tawuni ya Shekemu. Pati pajumpha nyengu, Yakobe wangutuma Yosefe kuti wakawoni aku ŵaki. Yiwu ŵati amuwona wachiza, angwamba kukambisana kuti: ‘Wakulota yo watuza ko. Tiyeni timubayi!’ Angumuko ndikumuponya muzenji litali. Yuda yo wenga yumoza wa aku ŵaki wangukamba kuti: ‘Kumubaya cha! Timugulisi ŵaka kuti wakaje kapolu.’ Mwaviyo, Yosefe angumugulisa ndi ndalama 20 za siliva kwa amalonda a ku Midiani wo alutanga ku Egipiti.

Pavuli paki, aku ŵaki anguto mukhanju waku Yosefe ndi kuwubiza mundopa za mbuzi ndipu anguluta nawu kwa awisewu. Yiwu angukamba kuti: ‘Kumbi mukhanju uwu ngwa mwana winu cha?’ Yakobe waŵanaŵananga kuti Yosefe wabayika ndi nyama ya mudondu. Iyu wanguliya ukongwa ndipu wakananga kupembuzgika.

Yosefe angumugulisa kuti waje kapolu ku Egipiti kwaku potifara yo wenga ndi udindu. Kweni Yehova wavikiliyanga Yosefe. Potifara wanguwona kuti Yosefe wagwiranga umampha ntchitu ndipu wangumugomeza. Pati pajumpha nyengu yimanavi angumusankha kuti wawoneriyengi vinthu vosi vo wenga navu.

Muwolu waku Potifara wanguwona kuti Yosefe wenga wakutowa kweniso wanthazi. Zuŵa lelosi wakambiyanga Yosefe kuti wagonani nayu. Kumbi Yosefe wanguchitanji? Iyu wangukana ndipu wangukamba kuti: ‘Awa!  Kuchita venivi nkhunanga. Abwana ŵangu atindigomeza ndipu yimwi ndimwi awolu ŵawu. Asani ndingagonana namwi, ndinangiyengi Chiuta!’

Zuŵa linyaki muwolu waku Potifara wanguchichiza Yosefe kuti wagonani nayu. Mwaviyo, wangumubwaka ndi kuguza chakuvwala chaki kweni Yosefe wanguthaŵa. Potifara wati waza panyumba, muwolu waki wangumukambiya boza. Iyu wangukamba kuti Yosefe wakhumbanga kumukolere. Potifara wangukwiya ukongwa ndipu wangumuŵika mujeri kweni Yehova wangumuluwa cha Yosefe.