Ja bʼa yuntikil ja Jacob, ja José yeʼn ijtsʼinal. Ja smoj-alijelik yilawe ja José yeʼn mas jel xkʼanji yuja stati. ¿Jastal maʼ yabʼye ja yeʼnleʼi? Yilkʼujolane sok skorajaʼane. Jaxa José ay jastik swaychin, pe tuk tʼusan waj ja swayichiki. Ja yeʼn xcholo yabʼ ja smoj-alijeliki. Ja yeʼnleʼi spensarane oj kʼot jun kʼakʼu oj koʼuke sbʼaj mekʼan ja José. Ja yuj masto och yilkʼujoluke.

Jun kʼakʼu, ja smoj-alijelik ja José wane stalnajel ja xchejeʼi mojan bʼa chonabʼ bʼa Siquem. Jaxa Jacob sjeka ja José bʼa yiljel jastal wajumyujile. Yajni najato yilawe jakumi, kʼe yal-e: «Ti jakum ja tan waychinumi. ¡La jmiltik!». Ja yuj syamawe sok sjipawe bʼa jun chaʼanil kʼeʼen. Pe ja Judá, june ja bʼa smoj-alijeli, yala: «Moka milex. Mas lek la jchontik bʼa akʼot jun moso». Sok jachni skʼulane. Tupjiyile 20 sat plata yuj jujuntik manbʼanumik bʼa Madián bʼa ti wajume bʼa Egipto.

Tsaʼan, ja smoj-alijeliki sbʼalaweyi ja skʼu ja José soka xchikʼel jun chibo. Tixa yiʼaje ochyi ja stati sok sjobʼoweyi: «¿Mi maʼ jaʼuk ja it ja skʼu jawa keremi?». Ja Jacob skʼuʼan milji ja José yuj jun kʼakʼal chante. Ja yuj jel och juntiro stristeʼil. Mini maʼ bʼobʼ yayi kulan skʼujol.

Ja bʼa Egipto, jun winik jel chaʼan ja xchol sbʼiʼil Potifar smana ja José bʼa oj smosoʼuk. Pe ja Jyoba ti ajyi soka José. Ja Potifar yila ja José jun lekil aʼtijum sok wa xbʼobʼ sjip skʼujol. Tixta ajiyi xchol yibʼanal ja bʼa jastik yiʼoj ja Potifar.

 Ja xcheʼum ja Potifar yila jel tsamal ja José sok jel ja yipi. Kʼakʼu kʼakʼu wa xkʼanjiyi ja José bʼa awaysok. ¿Jasa skʼulan ja José? Mini skʼana sok wa xyala yabʼ: «Miyuk, ja jaw mini lekuk. Ja kajwali wa sjipa jkʼujol jmok, sok xcheʼuma. Yujkʼa wayon amok, ojni jtaʼ jmul soka Dyos».

Jun ekʼele, ja xcheʼum ja Potifar sleʼa modo stʼenjel ja José bʼa awaysok. Syamayi ja skʼuʼi, pe ja José el ajnel. Yajni ja Potifar kumxi ja bʼa snaji, lejiyi abʼal yuja xcheʼumi. Ja yeʼn yala yabʼ ixtalaji yuja José. Ja Potifar jel tajki juntiro sok xchʼika preso. Pe ja Jyoba mi chʼay skʼujol bʼa José.