DYONDZO 14
Hlonga Leri Yingiseke Xikwembu
Yosefa a a ri un’wana wa vana va Yakobo lavatsongo. Vabuti wakwe va xiye leswaku tata wa vona a a rhandza Yosefa ku va tlula. U ehleketa leswaku va titwe njhani hi mhaka yoleyo? Va sungule ku vondzoka Yosefa va tlhela va n’wi venga. Loko Yosefa a lorhe milorho leyi nga tolovelekangiki, u byele vabuti wakwe hi yona. Va sungule ku ehleketa leswaku milorho yoleyo yi vula leswaku siku rin’wana va ta va malandza yakwe. Sweswo swi nyanyise ndlela leyi a va n’wi venga ha yona!
Siku rin’wana vabuti wa Yosefa a va ri eku riseni ka tinyimpfu ekusuhi ni muti wa Xikeme. Yakobo u rhume Yosefa leswaku a ya kamba vamakwavo loko va ha pfukile. Va n’wi vone a ha ta hi le kule, kutani va byelana va ku: ‘Hi loyi n’wa-milorho a taka. A hi n’wi dlayeni!’ Endzhaku ka sweswo, va n’wi khomile ivi va n’wi hoxa ekheleni ro enta. Kambe Yuda, un’wana wa vabuti wakwe u te: ‘Mi nga n’wi dlayi! A hi n’wi xaviseni leswaku a ya va hlonga.’ Kutani va n’wi xavisele Vamidiyani lava a va ya le Egipta hi swiphemu swa silivhere swa 20.
Endzhaku ka sweswo vabuti wakwe va teke nguvu yakwe va yi peta engatini ya mbuti, kutani va yi rhumela eka tata wa vona ivi va ku: ‘Xana leyi a hi nguvu ya n’wana wa wena?’ Hikwalaho, Yakobo a a ehleketa leswaku Yosefa u dlayiwe hi xivandzana. Sweswo swi n’wi tshove mbilu swinene naswona a ku nga ri na munhu loyi a a kota ku n’wi chavelela.
Le Egipta, Yosefa u xaviseriwe mutirhi wa le hubyeni la vuriwaka Potifaro leswaku a va hlonga rakwe. Kambe Yehovha u seketele Yosefa. Potifaro u xiye leswaku Yosefa a a tirha hi matimba entirhweni wakwe naswona a a tshembekile. Swi nga si ya kwihi, Potifaro u n’wi veke leswaku a langutela swilo swakwe hinkwaswo.
Nsati wa Potifaro u xiye leswaku Yosefa a a sasekile swinene naswona a a ri ni matimba. Siku ni siku a a kombela Yosefa leswaku a etlela na yena. Xana Yosefa u endle yini? U arile kutani a ku: ‘E-e! Mhaka leyi yi bihile. N’wini wanga wa ndzi tshemba naswona wena u nsati wakwe. Loko ndzo etlela na wena ndzi ta va ndzi dyohela Xikwembu!’
Siku rin’wana nsati wa Potifaro u ringete ku sindzisa Yosefa leswaku a etlela na yena. U n’wi koke hi swiambalo kambe Yosefa a chupula a baleka. Loko Potifaro a vuya, nsati wakwe u vule leswaku Yosefa a a lava ku n’wi pfinya. A a ri ku hembeni. Potifaro u hlundzukile swinene kutani a pfalela Yosefa ekhotsweni. Kambe Yehovha a nga n’wi rivalanga Yosefa.
“Hikokwalaho, titsongahateni ehansi ka voko ra matimba ra Xikwembu, leswaku xi ta mi tlakusa hi nkarhi lowu faneleke.”—1 Petro 5:6
U Nga Ha Tsakela
TIMHAKA TA BIBELE LETI NGA NI SWIFANISO
Yosefa A Ri eTikweni Ra Egipta
U nga xi tsakisa njhani Xikwembu hambiloko u nga voniwi hi munhu? Hlaya hi swifaniso swa mhaka leyi ya le Bibeleni kutani u dyondza eka xikombiso xa Yosefa.
SWITOLOVETO SWA TIMHAKA TA BIBELE
Yosefa—Ku Hehliwa Hi Mavunwa!
Yosefa u khotsiwe a nga ri na nandzu. U pfune hi yini ku tiyisela?
TIMHAKA TA BIBELE LETI NGA NI SWIFANISO
Mhaka Ya Vana Va Yakobe
U fanele u endla yini loko buti, sesi kumbe munghana wa wena a kuma xilo lexi a wu ta tsakela ku va na xona?
TIDYONDZO TA SWIFANISO
Yosefa U Xaviseriwa eVuhlongeni
Kopa tluka leri ro pendela eka rona u tlhela u ri printa kutani u languta swilo swimbirhi leswi nga fambisaniki ni mhaka leyi ya Bibele.
MAKHADI YA VANHU VA LE BIBELENI
Khadi Ra Bibele Ra Yosefa
Dyondza leswaku i yini xi endleke Faro a veka Yosefa ku va mufumi la nga ehansi ka yena aEgipta.
MAKHADI YA VANHU VA LE BIBELENI
Khadi Ra Bibele Ra Potifaro
Kopa khadi leri ra munhu wa le Bibeleni kutani u dyondza swo tala hi Potifaro n’wini wa Yosefa wa le Egipta.
