O Iosepha hoê o na tamaiti apî aˈe a Iakoba. Ua ite to ˈna mau taeae paari aˈe e o Iosepha te tamaiti here roa ˈˈe a to ratou metua tane. No oe, eaha ïa to ratou huru a ite ai i te reira? Pohehae atura ratou ia Iosepha e riri atura ratou ia ˈna. I te hoê mahana, ua faaite Iosepha i to ˈna mau taeae e mea ê ta ˈna mau moemoeâ. Ua taa ia ratou e ua moemoeâ Iosepha e ia tae i te hoê mahana e tipapa ratou i mua ia ˈna. Rahi roa ˈtu ïa to ratou riri ia Iosepha!

I te tahi mahana, ua haere te mau taeae o Iosepha e haapao i te nǎnǎ i pihai iho i te oire o Sekema. Tono atura Iakoba ia Iosepha no te haere e hiˈo ia ratou no te ite mea maitai anei ratou. Na te atea, ua ite ratou ia Iosepha e parau atura ratou: ‘Era ˈtu te taata moemoeâ! E taparahi haapohe anaˈe ia ˈna!’ Haru atura ratou ia ˈna no te taue atu i roto i te hoê apoo hohonu. Ua parau râ o Iuda, hoê o to ˈna mau taeae: ‘Eiaha e haapohe ia ˈna! E hoo anaˈe râ ia ˈna ei tîtî.’ Hoo atura ratou ia Iosepha no e 20 moni ario i te hoê pǔpǔ taata hoo taoˈa no Midiana o te haere ra i Aiphiti.

I muri iho, ua tuu te mau taeae o Iosepha i to ˈna ahu i roto i te toto puaaniho. Ua horoa ratou i te reira i to ratou metua tane ma te parau: ‘E ere anei te ahu o ta oe tamaiti?’ Manaˈo atura Iakoba e ua haapohe te hoê animara taehae ia Iosepha. Mauiui roa oia. Aita ˈtu taata i nehenehe e tamahanahana ia ˈna.

I Aiphiti, ua hoohia Iosepha ei tîtî i te hoê taata toroa, o Potiphara to ˈna iˈoa. Ua haapao noa râ Iehova ia Iosepha. Ua ite Potiphara e mea maitai roa te ohipa a Iosepha e e nehenehe e tiaturi ia ˈna. Aita i maoro, ua parauhia ia Iosepha ia haapao i te mau mea atoa a Potiphara.

Ua ite te vahine a Potiphara e mea nehenehe Iosepha e e tino pautuutu  to ˈna. I te mau mahana atoa, ua taparu oia ia Iosepha ia taoto ia ˈna. Eaha ta Iosepha i rave? Ua patoi oia e ua parau: ‘Aita! Mea ino tera. Te tiaturi nei ta ˈu fatu ia ˈu e e vahine oe na ˈna. Ia taoto vau ia oe ra, e hara vau i mua i te Atua!’

I te hoê mahana, ua tamata te vahine a Potiphara i te faahepo ia Iosepha ia taoto ia ˈna. Haru atura te vahine i to Iosepha ahu, ua horo ê râ o Iosepha. I hoˈi mai Potiphara i te fare, ua parau ta ˈna vahine e ua haru Iosepha ia ˈna no te taoto ia ˈna. E parau haavare hoi te reira. Riri rahi atura Potiphara e tuu atura oia ia Iosepha i te fare tapearaa. Aita râ Iehova i faarue ia Iosepha.