Иосиф Иаковтуң он бир дугаар оглу турган. Ачазы Иосифке өскелеринден артык ынак деп, улуг акылары эскерип каан. Чүү деп бодаар сен, олар чүнү миннип турган? Олар Иосифти адааргап, аңаа хөңнү чок турган. Бир катап Иосиф кайгамчык дүштер көргеш, акыларынга чугаалап берген. Ооң дүжүнде акылары аңаа келгеш, мөгейип турган. Акылары ону дыңнааш, Иосифке оон-даа хөңнү чок апарган!

Бир катап Иосифтиң акылары Сихем хоорайның чанынга хой кадарып турган. Оларны көрүпкеш кээр кылдыр, ачазы Иосифти чоргузупкан. Иосифти көрүп кааш, акылары: «Көрүңер даан, дүш көөр киживис кел чыдыр. Ону өлүрүп каалыңар!» — дээн. Олар Иосифти тудуп алгаш, ханы оңгарже киир октапкан. Ынчалза-даа акыларының бирээзи, Иуда, мынча дээн: «Ону өлүрбеңер! Ооң орнунга кулданыгже садыптаалыңар». Ынчаар олар Иосифти Египетче бар чыткан Мадиан чурттуг садыгжыларга чээрби шекел мөңгүнге садыпканнар.

Алышкылар Иосифтиң хевин сергениң ханынга борааш, ону ачазынче чоргузупкаш: «Бо сээң оглуңнуң хеви эвес-тир бе?» — деп айтырган. Иаков оглун араатан аң тудуп чипкен деп бодаан. Ол аңаа дыка аар согуг болган! Иаков аажок муңгараарга, ону кым-даа аргалап чадап каан.

Иосифти Египетке Потифар деп даргага садыпкан. Ынчалза-даа Иегова Иосифти кагбаан. Потифар ону эки ажылдакчы-дыр, аңаа бүзүреп болур деп көрген. Соонда ол эт-хөреңгизиниң дугайында сагыш човаар кылдыр Иосифти томуйлап каан.

Потифарның кадайы Иосифти чараш, күштүг деп эскерип каан.  Ол ону хүннүң-не кады удуул деп ээрежип туруп берген. Иосиф канчалган? Ол аңаа шиитпирлии-биле: «Чок, ол шын эвес чүүл-дүр! Даргам меңээ бүзүреп турар, а силер ооң кадайы-дыр силер. Силер-биле кады удуур болзумза, ол Бурганга удур бачыт боор!» — дээн.

Бир катап Потифарның кадайы Иосифти кады удуул дээш күш-биле албадап турган. Ол ону хевинден сегирип алырга, Иосиф үне халып чорупкан. Потифар бажыңынга чедип кээрге, кадайы: «Иосиф менче халдап турду» — деп нүгүлдээн. Потифар аажок хорадааш, Иосифти кара-бажыңче киир октапкан. Ындыг-даа бол, Иегова Иосифти утпаан.