Pokati komãla va Yakoba, Yosefe wa kala umalẽhe. Va huvaye va limbuka okuti Yosefe eye wa soliwile vali calua la isiavo. Nye o sima okuti oco ovo va yeva vutima? Ovo va kuatela esepa Yosefe kuenje vo suvuka. Eci Yosefe a lota olonjoi vimue vi komõhisa, wa lombolola olonjoi viaco ku va huvaye. Ovo va sima okuti olonjoi viaco vi lomboloka okuti eteke limue va ka fendela Yosefe. Omo liaco, esuvu liavo lia livokiya calua!

Eteke limue va huva a Yosefe va enda ocipepi lolupale luo Sekeme oku lisa olomeme. Omo liaco, Yakoba wa tuma Yosefe oco a ka tale ndomo upage wa va huvaye wa kala oku enda. Eci va muila Yosefe ocipãla, va livangula omunu lukuavo vati: ‘Ukuakulota olonjoi o kasi oku iya. Tu u pondi!’ Ovo vo kuata kuenda vo wimba vocitunu. Pole, Yuda umue pokati ka va huvaye wa popia hati: ‘Ka tu ko pondi! Tu u landisi ndupika.’ Ovo va landisa Yosefe leci ci soka 20 kolosiekele violopalata ku va Midiane vakualomĩlu vana va kala oku enda Kegito.

Vahuva a Yosefe vo lula ocikutu caye kuenje va ci yuvika vosonde yohombo, noke va tuma ocikutu caco ku isiavo loku popia vati: ‘Ocikutu eci hacomõloveko?’ Yakoba wa sima okuti ocinyama cimue ca tema ca ponda Yosefe. Kuenje Yakoba wa lila calua, okuti ka tavele oku u lembeleka.

Yosefe wa landisiwa ndupika Kegito kulume umue wa velapo o tukuiwa hati, Potifara kesongo kelombe. Pole, Yehova wa kuatisa Yosefe. Potifara wa limbuka okuti Yosefe wa kala onalavayi yiwa kuenda ca tavele okuti o kundikiwa ovopange akuavo. Noke Yosefe wa kundikiwa ovina viosi Potifara a kuata.

Ukãi wa Potifara wa limbuka okuti Yosefe ulume umue wa fina haeye wa pama. Eteke leteke ukãi waco wa enda oku yonja Yosefe oco a  pekele laye. Yosefe wa sukilile oku linga nye? Eye ka tavele kuenje wa popia hati: ‘Sio! Eci ka ca sungulukile. Cime cange wa kundika ovina viaye viosi peka liange, pole, ove wukãi waye. Nda nda pekela love ndi lingila ekandu Suku!’

Eteke limue ukãi wa Potifara wa yonja Yosefe oco a lipekele laye. Eye wa kuata vocikutu caye, pole, Yosefe wa tila. Eci Potifara a pitĩla konjo, ukãi waye wo sapuila okuti, Yosefe wa yonguile oku u kuata oco a lipekele laye. Pole, ukãi waco ka kaile oku vangula ocili. Potifara wa kuata onyeño yalua kuenje wa kapa Yosefe vokayike. Pole, Yehova ka ivalele Yosefe.