Yosefa o vha e muṅwe wa vhana vhaṱuku vha vhatukana vha Yakobo. Vhakomana vhawe vho ṱhogomela uri Yosefa o vha e ene a funeswaho nga khotsi avho. Ni humbula uri vho ḓipfa hani nga ha zwenezwo? Vho vha na vivho na u vhenga Yosefa. Musi Yosefa a tshi ḽora miḽoro i songo ḓoweleaho, o vhudza vhakomana vhawe nga hayo. Vho humbula uri yeneyo miḽoro i ambela kha uri ḽiṅwe ḓuvha vha ḓo tea u mu losha. Vha ṋaṋa u mu vhenga!

Ḽiṅwe ḓuvha vhakomana vha Yosefa vho vha vha tshi khou lisa nngu tsini na muḓi wa Sikeme. Yakobo a ruma Yosefa uri a ye u sedza uri vha khou lisa hani. Vha vhona Yosefa a tshi khou ḓa a kha ḓi vha kule nahone vha ri: ‘Mudzia u ḽora khoyu a tshi khou ḓa. Kha ri mu vhulahe!’ Vha mu fara nahone vha mu posa dindini ḽo tsaho. Fhedzi Yuda, muṅwe wa vhakomana vhawe, a ri: ‘Ni songo mu vhulaha! Kha ri tou mu rengisa a vhe phuli.’ Vha mu rengisela vharengisi vha Vhamidiani vhe vha vha vha tshi khou ya Egipita nga maseṱha a 20 a siliva.

Vhakomana vha Yosefa vha dzhenisa tshiambaro tshawe kha malofha a mbudzi nahone vha isa tshenetsho tshiambaro ha khotsi avho, vha ri: ‘Naa itshi a si tshiambaro tsha ṅwana wavho?’ Ngauralo, Yakobo a humbula uri Yosefa o vhulaiwa nga zwivhanda. Mbilu yawe yo vhavha vhukuma. A hu na we a kona u mu khuthadza.

Yosefa o rengiswa a vha phuli ya mulindi muhulwane a vhidzwaho Potifara wa ngei Egipita. Fhedzi Yehova o vha e na Yosefa. Potifara a vhona uri Yosefa u ita zwavhuḓi mushumo wawe nahone u a fulufhedzea. Nga u ṱavhanya, Yosefa a vhewa uri a ṱhogomele thundu yoṱhe ya Potifara.

Mufumakadzi wa Potifara a ṱhogomela uri Yosefa o naka nahone u na maanḓa. Ḓuvha ḽiṅwe na ḽiṅwe o vha a tshi humbela uri Yosefa a lale nae.  Yosefa o ita mini? O hana nahone a ri: ‘Hai! Hezwi zwo khakhea. Muṋe wanga u a mpfulufhela nahone inwi ni mufumakadzi wawe. Arali nda lala na inwi, ndi ḓo vha ndo ita tshivhi phanḓa ha Mudzimu!’

Ḽiṅwe ḓuvha, mufumakadzi wa Potifara a lingedza u kombetshedza Yosefa uri a lale nae. A mu fara nga zwiambaro zwawe, fhedzi ene a shavha. Musi Potifara a tshi vhuya hayani, a mu vhudza uri Yosefa o mu vutshela. O vha a tshi khou zwifha. Potifara a sinyuwa nga maanḓa nahone a valela Yosefa dzhele. Fhedzi Yehova ho ngo hangwa Yosefa.