Hi Jose usa han mga anak ni Jacob. Paborito hiya han iya tatay, ngan nakita ito han iya mga magurang. Ano daw la an ira gin-abat tungod hito? Naawa hira ngan nasina kan Jose. Han nagkaada hi Jose urusahon nga mga inop, iginsumat niya ito ha ira. Kahuna nira nga nangangahulogan ito nga maabot an panahon mayukbo hira ha iya. Salit nagduro pa an ira kasina!

Usa ka adlaw, ginbabantayan han kabugtoan ni Jose an ira mga karnero hirani ha syudad han Sikem. Ginpakadto ni Jacob hi Jose basi panginanoon hira. Hirayo pa hi Jose nakita na hiya han iya kabugtoan, hira nagsiring: ‘Adi an parainop. Patayon naton hiya!’ Gindanas nira hiya ngan iginhulog ha hilarom nga buho. Pero hi Juda nga iya bugto, nagsiring: ‘Ayaw hiya pataya! Ibaligya ta lugod hiya sugad nga uripon.’ Salit iginbaligya nira hi Jose hin 20 ka bug-os nga silber ha mga negosyante nga Midianitanhon nga tikadto ha Ehipto.

Katapos, igintunlob han kabugtoan ni Jose an iya bado ha dugo hin kanding ngan iginpakita ito ha ira tatay, ngan hira nagsiring: ‘Di’ ba bado ini han imo anak?’ Salit kahuna ni Jacob nga ginpatay hi Jose hin ihalas nga hayop. Nasubo gud hiya. Waray bisan hin-o nga nakaliaw ha iya.

Ha Ehipto, iginbaligya hi Jose sugad nga uripon ha opisyal nga hi Potipar. Pero hi Jehova kaupod ni Jose. Nakita ni Potipar nga maduruto hi Jose ngan masasarigan. Waray pag-iha, igintapod ni Potipar kan Jose an pagdumara ha ngatanan niya nga panag-iya.

Nakita han asawa ni Potipar nga gwapo ngan maskulado hi Jose. Kada adlaw, ginsisidngan niya hi Jose nga dumirig ha iya. Ano daw la  an bubuhaton ni Jose? Nagdumiri hiya ngan nagsiring: ‘Diri! Sayop ito. Gintataporan ako han akon agaron, ngan asawa ka niya. Kon dumirig ako ha imo, makakasala ako ha Dios!’

Usa ka adlaw, ginpirit han asawa ni Potipar hi Jose nga dumirig ha iya. Ginrabnot niya an bado ni Jose, pero nakapalagiw hi Jose. Pag-abot ni Potipar, nagsiring hiya nga ginpwersa hiya ni Jose. Waray hiya magsumat han tinuod. Nasina gud hi Potipar, ngan iya iginpapriso hi Jose. Pero waray kalimti ni Jehova hi Jose.