Joseeʼ, juntúul tiʼ u maas chichnil u paalaloʼob Jacob. U sukuʼunoʼobeʼ tu yiloʼob maas yaabiltaʼan tumen u papaʼob. ¿Bix a tuklik tu yuʼubilubaʼob? Jach tu pʼektoʼob. Junpʼéel kʼiineʼ, Joseeʼ tu wayakʼtaj baʼaloʼob jelaʼantakoʼob ka túun tu tsikbaltaj tiʼ u sukuʼunoʼob. Letiʼobeʼ tu tukloʼobeʼ le wayakʼoʼoboʼ u kʼáat u yaʼal yaan u kʼuchul u kʼiinil u chintaloʼob tu táan. Le oʼolal tu maas pʼektoʼob.

Juntéenjeakeʼ u sukuʼunoʼob Joseeʼ táan kaʼach u kanáantkoʼob tamanoʼob naatsʼ tiʼ u kaajil Siquem. Jacob túuneʼ tu túuxtaj José utiaʼal u yil wa maʼalob yanil u sukuʼunoʼob. Le ka tu yiloʼob táan u taal desde náachileʼ káaj u yaʼalikoʼob: ‹Jeʼel ku taal le máak chéen wayakʼ ku beetkoʼ. ¡Koʼoneʼex kíimsik!›. Tu machoʼob Joseeʼ ka tu puʼuloʼob tiʼ junpʼéel tikin chʼeʼen. Chéen baʼaleʼ Judá, juntúul tiʼ u sukuʼunoʼob Joseeʼ, tu yaʼalaj: ‹Maʼ a kíimskeʼex. Maas maʼalob ka k-koneʼex utiaʼal u palitsiltaʼal›. Bey tu beetiloʼoboʼ, tu konoʼob yoʼolal 20 u pʼéelel baʼaloʼob de plata tiʼ junjaats j-koonoloʼob madianiloʼob. Letiʼobeʼ táan u binoʼob kaʼach Egipto.

Ka tsʼoʼokeʼ u sukuʼunoʼobeʼ tu chʼaʼajoʼob u nookʼeʼ ka tu tʼuboʼob ichil u kʼiʼikʼel juntúul chivo. Tsʼoʼoleʼ tu bisoʼob tiʼ u papaʼobeʼ, ka tu yaʼaloʼobtiʼ: ‹¿Maʼ wa letiʼeʼ u nookʼ a hijoaʼ?›. Jacobeʼ tu tukleʼ kíimsaʼab José tumen juntúul tsʼíitsʼik baʼalcheʼ le oʼolal jach yaachaj u yóol. Mix máak kaʼach jeʼel u páajtal u líiʼsik u yóoleʼ.

Le ka kʼuchoʼob Egiptoeʼ, Potifar juntúul máak yaan autoridad tiʼeʼ tu manaj José utiaʼal u palitsiltik. Chéen baʼaleʼ Jéeobaeʼ maʼ tu tuʼubsaj Joseiʼ. Potifareʼ tu yilaj, jach maʼalob u meyaj José, le oʼolal jeʼel u páajtal kaʼach u confiar tiʼeʼ. Maʼ xáanchaj ka tu pʼataj u nuʼukt tuláakal le baʼax yaantiʼoʼ.

 U yatan Potifareʼ tu yilaj kiʼichkelem José yéetel jatsʼuts u yilaʼal u wíinklil, le oʼolal mantatsʼ táan u yaʼaliktiʼ ka chilak tu yéetel. ¿Baʼax túun ku beetik kaʼach José? Letiʼeʼ maʼ tu yóotik kaʼachi, ku yaʼalik tiʼ le koʼoleloʼ: ‹Maʼ maʼalobiʼ. In tsʼuulileʼ ku confiar tiʼ teen, tsʼoʼoleʼ techeʼ u yatanech. Wa ka chilaken ta wéeteleʼ yaan in kʼebantal tu táan Dios›.

Junpʼéel kʼiineʼ u yatan Potifareʼ tu yóotaj u obligart José utiaʼal ka chilak tu yéetel. Tu cháachaj José tu nookʼ, chéen baʼaleʼ letiʼeʼ púutsʼi. Le ka kʼuch Potifar tu yotocheʼ le koʼoleloʼ tuusnaji, tu yaʼalajtiʼeʼ taak bin kaʼach u violartaʼal tumen José. Potifar túuneʼ jach pʼuʼujeʼ ka tu yoksaj cárcel. Chéen baʼaleʼ Jéeobaeʼ maʼ tu tuʼubsaj Joseiʼ.