Yosefa angia tooni gude dagba awiri Yakobo yo. Aunvurako abi gupai nga bayo nakpinyemu ko ni bakerehe kisusi. Mo nabihe nga gayo bipai angia gine? I anaakpi Yosefa akpi na kini sogoko. Ho Yosefa arari musumo ni, ko apehe fu awirinako. I abihe nga gu musumo re nayugo gupai nga kura uru adu kinaho i nika kuko sande fuko. Awere, si asayo i sogoko berewe ni bakerehe!

Rogo kura uru sa, awiribako aangerafuo akandoro mbembedi na gu gbata nga Sekeme. Yakobo akedi Yosefa ko ndu ka bi wai i adu. Ho i abi Yosefa ni ko niye tuturũ, i aya dagbatiyo wẽ: ‘Gu boro musumo re naye. Ani imiko!’ I aziko na ki ba ko ku rogo dudunguro due. Ono Yuda, nga gu kura wiribako ki ya: ‘Ka oni imingo ko ya! Ani bagiko ni kanga.’ Sidu, i abagi Yosefa tipa afeda 20 fu agu ababagiahe nangia aMidiano naandu ku Ezipeta yo.

Sidu, awiribako ki imi meme ki puta gako roko na kureru na ki kedihe fu bako, niya: ‘Anga ga wiro roko du re te?’ Sidu, Yakobo aberẽhe nga nyarinde ima imo Yosefa. Kpotokoyo adu na bakere rungo. Boro ho narengbe ka fu wasa fuko te.

I abagi Yosefa berewe Ezipeta yo ni kanga fu gu nyanyakipa banyaki nangia Potifaro. Ono Yekova adu na Yosefa. Potifaro abi gupai nga Yosefa ima ino sunge wenengai na ko rengbe arengba ka kido kutiko. Fuoho aturongo te Potifaro ki moi Yosefa kurii agu ahe dunduko naadu beko.

Dia Potifaro abi gupai nga Yosefa ima ngba na ko adu  ngangarã. Aˈuru dunduko ri anaasana Yosefa ko kodiba na ri. Ginihe ka Yosefa amangihe? Ko aká na ki ya: ‘Oó! Gbegberẽpai du. Bairare na kido kuti re, na mo nga diako. Ka mi kodiba na mo, mi nika inga kuti Mbori!’

Rogo gu kura uru sa, dia Potifaro aˈasadi ka manga Yosefa ngbaome ko kodiba na ri. Ri aziko ti gako roko, ono ko ki oro aora. Ho Potifaro ayego ni, ri ape gupai nga Yosefa ni zubo ru. Ri aapenga rengo te. Rago agbere ni kerehe ti Potifaro, ko ki ba Yosefa ku bambukiso yo. Ono Bangiri Yekova aagonga ti Yosefa te.