José góc xiin lahuin Jacob. Guirá buch lagol José biduidyibu cuent que Jacob más nadxiʼbu José. ¿Ximod gosacyibu ór cú? Bianladxyibu José. Toibtica dzú goniʼ xcaʼal José né gochcabu láani guirá buch lagolbu. Layibu bunyibu pensary que bacaʼalcu raduidyni diitz que sadxin toib dzú ni saxixipyibu nisló José. ¡Por ngú más bianladxyibu José!

Toibtica dzú guirá buch lagol José cayanyibu xilieen gahxca gudx ni laa Siquem. Jacob bixelbu José tzabiʼ ximod noʼyibu. Sitsaʼ sieed José órni guirá buchbu bibiʼ láabu, né gosaló goniʼyibu: «Ca sieed ni raniʼgolu xcaʼal. ¡Guigaityno láabu!». Ór cú gonásyibu né bisalbu José lainy toib garió. Per toibtica buchbu ni góc laa Judá goniʼ: «Diti guigaityto láabu. Más galán guitoʼno láabu par gacbu xomós buñ». Ór cú madianitas ni see Egipto gosiʼ láabu por 20 nilas de plata.

Después guirá buchbu bigaity toib xiil né bigasyibu xirunymu ló xhap José né goynéyibu láani ronoʼ bixiosyibu. Ór cú gonabdiitzyibu Jacob: «¿Diti xhap xiingaʼnlo José ndeʼ la?». Jacob nigolú goyoʼ nabann portín bunybu pensary que toib mainyguiʼix bigaity José. Diti goyoʼ ni labúu bisialdó xcalnabanybu.

Órni bidxinbu Egipto, toib buñxirop ni góc laa Potifar gosiʼ láabu par ñacbu mós. Per Jehová guirá ór goyoʼbu né José. Potifar biduidy cuent que José nacbu toib buñ ni nan rony dxiin né gopbu confianz José. Ló goxeʼsi tiemp bisiambu guirá xcósbu ladxña José.

 Tzeʼel Potifar bibiʼbu que José nac toib mbioxhlas móz né que nadipbu. Guirási ór gochbu José ñatné láabu. ¿Xí buny José? Diti gosaguelbu né goniʼbu: «¡Yaca! Diti soni cós malca. Tzeʼel lo nap confianz naʼ, né looy naclo tzeelbu. Pal gatnéya looy soni toib galkié rodann nisló Dios».

Toibtica dzú tzeʼel Potifar nábu nanás lafuersbu José. Gonásbu xhap José, per José bixony. Órni bidxin Potifar lidx, tzeelbu biscú láabu, goniʼbu que José ná nanás lafuers láabu. Potifar nigolú bidzuitz né goloʼbu José lachquiip. Per Jehová diti bialadxbu José.