Joseajj carcelankaskänwa, ukhaw Egipto marka apnaqer faraonajj samkasïna, uka samkapjja janiw khitis qhanañchirjamäkänti. Ukatwa faraonan mä serviripajj ‘Joseaw qhanañchiristam’ sasin säna. Faraonajj ratukiw Josear irptayanïna.

Akham sasaw jisktʼarakïna: ‘¿Samkajajj kamsañsa muni uk qhanañchitasmati?’ sasa. Joseajj sänwa: ‘Egipto markanjja paqallqo maraw manqʼajj wal achoqani, ukatjja paqallqo mararakiw machʼajj utjani. Mä yatiñan jaqe ajllisim, manqʼa sum imkatañapataki, ukhamatwa jan khitis manqʼatjam jiwkaniti’ sasa. Faraonasti sarakïnwa: ‘¡Jumaruw ajllsma! Jumajj wali munañaniyätawa, nayakiw jumat jilïrejj utjäjja’ sasa. ¿Kunjamatsa Joseajj faraonan samkapajj kamsañsa muni uk yatpachäna? Jehová Diosaw yanaptʼäna.

Joseajj paqallq maraw manqʼañanak wal imkatäna. Qhepatjja kunjamtï Joseajj siskäna ukhamapuniw machʼajj taqe cheqan utj-jjäna. Taqe cheqatwa manqʼa alasirejj Egiptor jutapjjäna. Jacob chachas ‘Egiptonwa manqʼajj utjaski’ sasin parlir istʼarakïnwa, ukatwa manqʼañanak alanipjjañapatakejj 10 yoqanakapar khitanïna.

Jacobun yoqanakapajj Josearuw jakʼachasipjjäna. Jupajj ratukiw khitinakäpjjes uk amuyäna, jilanakapasti janiw amuyapkänti. Joseajj waynäkasin samkaskäna ukarjamaw jupa nayraqatan altʼasipjjäna. Uñisisipkakïnti janicha uk yatiñwa Joseajj munäna, ukatwa säna: ‘Jumanakajj markajajj chʼamanit janich uk uñaqeriw jutapjjtajja’ sasa. Jupanakasti sapjjänwa: ‘¡Janiw uñaqerïpkti! Canaán markatäpjjtwa.  12 jilanakäpjjayätwa, maynejj jiwjjewa. Sullkajj tatajampïskiwa’ sasa. Joseajj sänwa: ‘Sullkamar irptanipjjam ukhaw creyipjjäma’ sasa. Tatapan ukaruw kuttʼjjapjjäna.

Jacobun familiapajj wasitat jan manqʼani uñjasïna, ukatwa yoqanakaparojj mayampi Egiptor khitäna. Benjamín sullkaparus irpapjjarakïnwa. Joseajj jilanakapar yantʼañatakejja Benjaminan manqʼa bolsaparuw qollqet lurat copap asantäna. Ukatjja lunthatapjjestawa sasaw juchañchäna. Josean servirinakapajj thaqtasinjja, Benjaminan bolsapatwa uka copa apsupjjäna, jilanakapajj wal sustjasipjjäna. ‘Benjaminar castigañat sipansa, nanakar castigapjjeta’ sasaw Josear ruwtʼasipjjäna.

Jilanakapajj janiw nayrjam uñisirëjjapjjänti, ukwa Joseajj amuyäna. Ukatjja janiw aguantirjamäjjänti, jachtʼasisaw akham säna: ‘Joseätwa, jumanakan sullka jilamätwa. ¿Tatajajj jakaskiti?’ sasa. Jilanakapajj wal llaktʼasipjjäna. Joseasti sarakïnwa: ‘Kuntï lurawayapkista ukat jan llakisipjjamti. Diosaw akar irpanitu, jumanakar salvañataki. Jichhajj tatajar jankʼak irptanipjjam’ sasa.

Jilanakapajj utaparuw kuttʼapjjäna, tatapar suma yatiyäwinak yatiyañataki ukhamarak Egiptor irptaniñataki. Walja maranakatwa, Joseampi tatapampejj mayamp nayrjam jakasjjapjjäna.