Éyoñe Joseph a nga too mimbôk, Pharaon, njô bôte y’Égypte a nga yem biyeyem biziñ. Môt éziñ a nji kui na a kate nye jôme biyeyem bite bia tinan. Nde mbo ésaé wé éziñ a nga kate nye na, Joseph a ne ngule ya timine nye biyeyem bite. Ane Pharaon a nga jô na be ji’a nye ke loon.

Éyoñe Joseph a soya, Pharaon a nga sili nye na: ‘Ye ô ne ngule ya kate ma jôme biyeyem bite bia tinan?’ Nde Joseph a nga jô Pharaon na: ‘Mimbu zangbwal mia zu mi, bidi bia ye bo si y’Égypte ne lut, ve mimbu zangbwal mia ye tôñe mili, mbia zaé é bo si y’Égypte. Tobe’e môt a ne fek, môt a ye ba’ale bidi, asu ya na bôte bôé be bo te wu zaé.’ Nde Pharaon a nga yalane nye na: ‘Me beta tobe za mfe? Ke wo ma top. Wo ye bo môte baa ya si y’Égypte!’ Jé é nga bo na Joseph a yeme jôm biyeyem bi Pharaon bia tinan? Yéhôva nnye a nga volô nye.

Ane Joseph a nga taté na a ba’ale bidi. Éyoñ mimbu zangbwal mi ôsu mi lôteya, zaé ve so si ése avale Joseph a nga jô. Bôte be mbe be so’o bevôm bevôm na ba zu kuse bidi Égypte. Éyoñ ésa Joseph a nga wô’ô na bidi bi ne Égypte, nde a nga lôme bone bé na be ke kuse be jôme ya di.

Éyoñe Joseph a nga yene bobenyañe bé, a nga yeme be été été. Ve bobenyañe bé be nji yeme nye. Be nga kute nye meboñ, fo’o ve aval a nga yem e biyeyem éyoñ a mbe a ngenane mongô. Joseph a mbe a kômbô’ô yem nge bobenyañe be tyendéya. Ane a nga jô be na: ‘Mi ne beloé si. Mia te zu yemelan bevôme si y’Égypte é nji bo ngul.’ Nde be  nga yalane nye na: ‘Teké’é! Bi ne 12, bon be ésa wua. Bi jañeleya mojañe wua, a nyu a ne mesu’ulan a te li’i a ésa wongan.’ Ve Joseph a nga ke ôsu a jô’ô na: ‘Nge mia yi na me buni mia, za’ane ma monyañe wônan a ne mesu’ulan.’ Ane be nga bulane be ésa wop.

Éyoñe bidi be nga kee bie bi nga man, Jacob a nga beta lôme be Égypte. Ve be nga kee fe Benjamin, monyañe wop a ne mesu’ulan. Joseph a nga futi élaé argent nkuta bidi Benjamin, amu a mbe a kômbô’ô ve’ele be. Nde a nga bôte be ajô na, be ne miñwuwup. Éyoñe bebo bisaé be Joseph be nga ke koon élaé éte nkuta bidi Benjamin, bobenyañe bé ve zu wô’ô bebien mbia éngôngol. Ane be nga ye’elane Joseph na, a foñôsô be señe Benjamin.

Éyoñ éte nje ñhe Joseph a nga yeme na bobenyañe bé be tyendéya. A nji be ngule ya ke ôsu a bo ane a nji yeme be, nde a nga bôé ñyôn a jô na: ‘Me ne monyañe wônan Joseph. Ye pepa a ngenan a vee?’ Bobenyañe be nga kam abui. Ane a nga jô be na: ‘Te mia ko woñ amu jam mi nga bo ma. Zambe nnye a nga lôme ma va, asu ya na me nyii mia. Ji’ané ke loone pepa a zu va.’

Ane be nga bulan, a ji’a ke kat ésa wop mbamba foé ate, a so nye Égypte. Joseph ba ésa wé be nga beta yenan, valé be kandaneya abui mimbu.