Tuma min na Yusufu tun be kaso la, Ezipiti masacɛ Farahuna ye siko dɔw kɛ mɔgɔ si tun tɛ se ka minw kɔrɔ fɔ. Farahuna ka baaraden dɔ y’a fɔ a ye ko Yusufu be se k’a ka sikow kɔrɔ fɔ a ye. Farahuna sinna k’a fɔ k’u k’a weele ka na.

Farahuna y’a ɲininga ko: ‘I be se ka ne ka sikow kɔrɔ fɔ wa?’ Yusufu y’a fɔ Farahuna ye ko: ‘Saan wolonfila kɔnɔ, suman bena caya Ezipiti jamana na. O kɔ, kɔngɔ bena don ka saan wolonfila kɛ. I ka mɔgɔ hakilitigi dɔ sugandi walisa a ka sumanw lajɛn ka mara. O la, jama tɛna sa kɔngɔ bolo.’ Farahuna ko: ‘N’ b’ele lo sugandi! I bena kɛ Ezipiti mɔgɔba filanan ye!’ Yusufu ye Farahuna ka sikow kɔrɔ lɔn cogo di? Jehova lo y’a dɛmɛ.

Saan wolonfila kɔnɔ, Yusufu ye sumanw cɛ ka mara. O kɔ, kɔngɔ donna dugukolo yɔrɔ bɛɛ la i ko Yusufu tun y’a fɔ cogo min na. Mɔgɔw bɔra yɔrɔ bɛɛ ka na suman san Yusufu fɛ. A faa Yakuba y’a mɛn ko suman be sɔrɔ Ezipiti jamana na. O kama, a y’a dencɛ tan ci ka taga dɔ san.

Yakuba dencɛw tagara Yusufu fɛ. Yusufu y’u lɔn yɔrɔnin kelen. Nka a kɔrɔcɛw tun m’a lɔn ko Yusufu lo. U y’u kunbiri gwan duguma a ɲɛɛ kɔrɔ i ko a tun y’a ye cogo min na a ka siko la a kanbele tuma. Yusufu tun b’a fɛ k’a lɔn n’a kɔrɔcɛw kɔnɔ bele ka jugu. O kama a y’a fɔ u ye ko: ‘Aw nana jamana filɛ dogo dogo la le. Aw b’a fɛ k’a lɔn an ka jamana yɔrɔ min fanga ka dɔgɔ.’ U  ko: ‘Ɔn ɔn! An tun ye balimacɛ 12 lo ye ka bɔ Kanaan mara la. Kelen sara, dɔgɔcɛman b’an facɛ kɔrɔ.’ O kɔ, Yusufu ko: ‘ A’ ye na n’aw dɔgɔcɛ ye, o la ne bena la aw la.’ U kɔsegira u faa fɛ soo.

Yakuba somɔgɔw ka suman banna tugun tuma min na, a y’a dencɛw ci ko u ka kɔsegi Ezipiti jamana na. Sisan, u tagara n’u dɔgɔcɛ Bɛnzamɛn ye. Yusufu y’a ka warigwɛ jifilen don Bɛnzamɛn ka suman bɔrɔ kɔnɔ walisa k’a kɔrɔcɛw kɔrɔbɔ. O kɔ, a ko u y’ale ka jifilen soɲɛ. Yusufu ka baaradenw y’o jifilen sɔrɔ Bɛnzamɛn ka bɔrɔ kɔnɔ tuma min na, o koo ye Bɛnzamɛn kɔrɔcɛw tɔɔrɔ. U ye Yusufu deli a k’olu ɲangi Bɛnzamɛn nɔɔ na.

Yusufu y’a lɔn sisan ko a kɔrɔcɛw sɔɔn yɛlɛmana. A tun tɛ se k’a yɛrɛ minɛ tugun. A ye kasi daminɛ ni kaanba ye ani a ko: ‘Ne ye aw balimacɛ Yusufu ye. N’ facɛ bele be sii la wa?’ O koo barila a balimaw la yɛrɛ le. A y’a fɔ u ye ko: ‘Aw tun ye min kɛ ne la, aw kana aw dusu tiɲɛ o kama. Ala lo ye ne ci yan walisa k’aw niin kisi. Sisan a’ ye teliya ka taga n’ facɛ ta ka na n’a ye yan.’

U kɔsegira soo ka taga o kibaro diiman fɔ u facɛ ye ani k’a ta ka taga n’a ye Ezipiti jamana na. Saan caaman tɛmɛnin kɔ, Yusufu n’a faa labanna ka kɛ ɲɔgɔn fɛ tugun.