Be ni awo Yosef tsuŋ lɛ, Farao, Ejipt maŋtsɛ lɛ, la lamɔi komɛi ni mɔ ko mɔ ko nyɛɛɛ atsɔɔ shishi. Etsuji lɛ ekome kɛɛ lɛ akɛ Yosef baanyɛ atsɔɔ lɛ elamɔi lɛ ashishi. No hewɔ lɛ, Farao tsu ni ayatsɛ Yosef kɛba amrɔ nɔŋŋ.

Farao bi lɛ akɛ: ‘Ani obaanyɛ otsɔɔ mi milamɔi lɛ ashishi?’ Yosef kɛɛ lɛ akɛ: ‘Abaaná niyenii babaoo yɛ Ejipt afii kpawo, ni no sɛɛ lɛ, hɔmɔ baaba afii kpawo. Taomɔ mɔ ko ni hiɛ kã shi koni ekɛ niyenii lɛ eko ato bɔ ni afee ni hɔmɔ akaye omaŋbii lɛ.’ Farao kɛɛ lɛ akɛ: ‘Mikɛ nakai nitsumɔ lɛ baahã bo! Misɛɛ lɛ, bo oyɔɔ!’ Te Yosef fee tɛŋŋ etsɔɔ Farao lamɔi lɛ ashishi lɛ? Yehowa ni ye ebua lɛ.

No hewɔ lɛ, be ni niyenii lɛ ba afii kpawo lɛ, Yosef bua niyenii pii naa. No sɛɛ lɛ, hɔmɔ ba je lɛ mli he fɛɛ he, tamɔ bɔ ni Yosef wie lɛ pɛpɛɛpɛ. Mɛi jɛ je lɛŋ hei srɔtoi amɛbahe niyenii yɛ Yosef ŋɔɔ. Epapa Yakob nu akɛ niyenii yɛ Ejipt, no hewɔ lɛ etsu ebihii nyɔŋma kɛtee jɛmɛ koni amɛyahe eko kɛba.

Be ni Yosef na Yakob bihii lɛ nɔŋŋ ni ena mɛi ni amɛji. Ena akɛ enyɛmimɛi lɛ ni. Shi amɛ lɛ, amɛkaiii lɛ. No hewɔ lɛ, amɛkula shi yɛ ehiɛ, tamɔ bɔ ni Yosef la be ni eji gbekɛ lɛ. Shi akɛni Yosef miitao ena kɛji enyɛmimɛi lɛ etsake amɛsubaŋ fɔŋ lɛ hewɔ lɛ, ekɛɛ amɛ akɛ: ‘Maŋshikpálɔi ji nyɛ! Nyɛba koni nyɛbakwɛ hei ni abaanyɛ atsɔ kɛbafite wɔmaŋ lɛ!’ Shi amɛkɛɛ: ‘Dabida! Wɔjɛ Kanaan, ni nuu kome bihii ji wɔ. Wɔyi 12, shi wɔnyɛmi nuu lɛ  ekome egbo, ni naagbee mɔ lɛ yɛ wɔpapa ŋɔɔ.’ Kɛkɛ ni Yosef kɛɛ amɛ akɛ: ‘Nyɛkɛ nyɛnyɛmi nuu fioo lɛ abaa biɛ, no dani mana akɛ nɔ ni nyɛwieɔ lɛ ji anɔkwale.’ No hewɔ lɛ, amɛku amɛsɛɛ kɛtee amɛpapa ŋɔɔ yɛ shĩa.

Shi sɛɛ mli lɛ, amɛniyenii fɛɛ tã ekoŋŋ, no hewɔ lɛ, Yakob tsu ebihii lɛ kɛtee Ejipt ekoŋŋ. Be ni amɛyaa lɛ, amɛkɛ amɛnyɛmi nuu fioo, Benyamin, fata amɛhe kɛtee. Be ni amɛtee lɛ, Yosef fee nɔ ko ni baahã ena kɛji amɛtsake lɛɛlɛŋ. Ehã akɛ ejwiɛtɛi kɔɔpoo lɛ wo Benyamin niyenii baagi lɛ mli, kɛkɛ ni ewie eshi amɛ akɛ amɛbaju lɛ. No hewɔ lɛ, atao amɛnibii lɛ amli, ni ayana kɔɔpoo lɛ yɛ Benyamin baagi lɛ mli. Sane lɛ fee enyɛmimɛi lɛ naakpɛɛ. Amɛkpa Yosef fai akɛ egbala amɛ moŋ amɛtoi ni eshi Benyamin.

Be ni Yosef na akɛ enyɛmimɛi lɛ etsake lɛɛlɛŋ lɛ, enaaa nɔ ni efeɔ ehe. Ebɔi yaafo, ni ekɛɛ akɛ: ‘Minyɛmimɛi, mi Yosef ni. Ani mipapa yɛ jeŋ lolo?’ Enyɛmimɛi lɛ anaa kpɛ amɛhe waa. Shi ekɛɛ amɛ akɛ: ‘Nyɛkahãa edɔa nyɛ akɛ nyɛfee mi nakai. Nyɔŋmɔ tsu mi kɛba biɛ koni mahere nyɛyiwala. Nyɛhe afea oya ni nyɛyawóa mipapa kɛbaa biɛ.’

Yosef nyɛmimɛi lɛ ku amɛsɛɛ kɛtee shĩa ni amɛyagba amɛpapa nɔ ni tee nɔ lɛ fɛɛ, ni amɛwó lɛ kɛba Ejipt. No hewɔ lɛ, naagbee lɛ, Yosef na epapa ekoŋŋ yɛ afii pii asɛɛ.