Ngke e mena Ioteba n te karabuuti, ao e mii Barao ae uean Aikubita ao akea ae kona ni kabwaraa nanoni miina. E taetae temanna ana toro Barao bwa e kona Ioteba ni kabwaraa nanoni miina. E kanaanako ngkekei naba Barao bwa e na weteaki Ioteba.

E taku Barao nakoina: ‘Ko kona ni kabwaraa nanoni miiu?’ Ao Ioteba e tuanga Barao ni kangai: ‘E na bati te amwarake i Aikubita i nanon itiua te ririki, ao n taorimwiaki n itiua te ririki n rongo. Rinea temanna ae wanawana bwa e na kaikoa te amwarake bwa a aonga n aki baki am aomata.’ E kaeka Barao ni kangai: ‘I rineiko! Ko na riki bwa te kauoman ni kakannato i Aikubita!’ E kangaa Ioteba n ataa nanoni miin Barao? E boni buokia Iehova.

I nanon ririki aika itiua ao e kaikoa te amwarake Ioteba. E a roko imwina te rongo ni kabutaa te aonnaba, n aron are e taekinna Ioteba. A roko aomata man taabo nako bwa a na kabooa te amwarake iroun Ioteba. E ongo tamana ae Iakoba bwa iai te amwarake i Aikubita, ngaia are e a kanakoia natina mwaane ake tengaun bwa a na kabooi kanaia.

A roko natin Iakoba iroun Ioteba ao e a boni kinaia naba. Ma tarina aikai, a a aki roko n te kinaa Ioteba. A bobaraaki i matana, n aron raoi miina ngke e ataei. E kan ataia Ioteba bwa a teimatoa ni kairiribai tarina ke a aikoa. Ngaia are e taku nakoia: ‘Bon taani karaba n tutuo ngkami. Kam boni kan ataia bwa tera mamaaran abara.’ A taku: ‘Tiaki ngaia anne! Bon taari aika 12  ngaira mai Kanaan. E mate temanna tarira ao e tiku are te bina i rarikin tamara.’ Ma e taku Ioteba: ‘Kairaamai tarimi ane te bina nakoiu ao I a kakoauai naba ngkami.’ Ngaia are a a okira mwengaia nakon tamaia.

Ngke e a bane kanaia ana utu Iakoba, e a manga kanakoia naba natina nako Aikubita. N te tai aei, a a kaira Beniamin are tariia are te bina. E karabaa Ioteba ana mwangko ae te tirewa n ana baeki ni uita Beniamin bwa e na tuoia tarina, ao e bukinia bwa a kimoaia. Ngke a a kunea te mwangko n ana baeki Beniamin ana toro Ioteba, ao a rangi ni kubanako iai tarina. A bubutiia Ioteba bwa e na katuuaaeia ao tiaki Beniamin.

E a ataia n te tai anne Ioteba bwa a a bitaki tarina. E a aki kona n taona nanona Ioteba ngaia are e a tang ao e taku: ‘Bon Ioteba ngai are tarimi. E boni maiu naba tamau?’ A rangi ni kubanako tarina ao e taku nakoia: ‘Tai raraoma n te bwai ae kam a tia ni karaoia nakoiu. E boni kanakomaiai te Atua ibukini kamaiuami. Kawaekoaingkami ni kairaamai tamau.’

A okira abaia ao a tuanga tamaia te rongorongo ae kakukurei ao a a kairia nako Aikubita. E a manga kaitiboo Ioteba ma tamana imwin ririki aika rangi ni bati.