Whenue Josẹfu to gànpamẹ, Falo, Ahọlu Egipti tọn kudlọ delẹ bọ mẹdepope ma gán dọ zẹẹmẹ odlọ lọ lẹ tọn. Dopo to devizọnwatọ Falo tọn lẹ mẹ dọna ẹn dọ Josẹfu gán dọ nuhe odlọ etọn lẹ zẹẹmẹdo na ẹn. Falo domẹhlan nado yì plan Josẹfu wá to afọdopolọji.

Falo kanse e dọmọ: ‘Be a gán basi zẹẹmẹ odlọ ṣie lẹ tọn ya?’ Josẹfu sọ dọna Falo dọ: ‘Núdùdù na sù to Egipti na owhe ṣinawe, bọ to enẹgodo huvẹ na tin na owhe ṣinawe. Deazọ́nna omẹ nuyọnẹntọ de nado bẹ núdùdù pli do agbànhọ lẹ mẹ, na omẹ towe lẹ nikaa ba núdùdù pò.’ Falo gblọn dọmọ: ‘Hiẹ wẹ n’de! Hiẹ wẹ na yin omẹ awetọ he na bọdo go e to Egipti!’ Nawẹ Josẹfu wagbọn do yọ́n nuhe odlọ Falo tọn lẹ zẹẹmẹdo? Jehovah wẹ gọalọna ẹn.

To owhe ṣinawe he bọdego lẹ gblamẹ, Josẹfu bẹ núdùdù susu pli do agbànhọ lẹ mẹ. Enẹgodo, huvẹ tọ́n to aigba lẹpo ji, kẹdẹdile Josẹfu ko dọ do. Mẹlẹ nọ wá sọn filẹpo nado họ̀ núdùdù to Josẹfu si. Otọ́ etọn Jakọbu sè dọ núdùdù tin to Egipti, enẹwutu e do visunnu etọn ao hlan dọ́n nado yì họ̀ núdùdù wá.

Visunnu Jakọbu tọn lẹ yì Josẹfu dè, bọ e yọ́n yé to afọdopolọji. Amọ́, nọvisunnu etọn lẹ ma yọnẹn dọ Josẹfu wẹ. Yé sọ dẹ́ do odò na ẹn, kẹdẹdile e ko kudlọ etọn to ovu whenu do. Josẹfu jlo na yọnẹn eyin wangbẹna gbẹ́ pò to ahun nọvisunnu etọn lẹ tọn mẹ. Enẹwutu, e dọna yé dọmọ: ‘Amẹ́ wẹ mìwlẹ. Fihe ma tindo hihọ́ to aigba mítọn ji lẹ wẹ mì jlo na dindona.’ Yé sọ dọmọ: ‘Lala! Nọvisunnu 12 wẹ mí yin bo wá sọn Kenani.  Dopo to nọvisunnu mítọn lẹ mẹ ko kú bọ omẹ pẹvi pete lọ to otọ́ mítọn dè.’ Josẹfu dọna yé dọmọ: ‘Nọvisunnu mìtọn pẹvi pete lọ wẹ mì na plan wá whẹpo n’nado yí mì sè.’ Enẹwutu, yé lẹkọyi otọ́ yetọn dè.

Whenue núdùdù sọ vọ̀ do whẹndo Jakọbu tọn, e gọ̀ visunnu etọn lẹ dohlan Egipti. Todin, Bẹnjamini, nọvisunnu yetọn pẹvi pete lọ hodo yé. Nado whlé nọvisunnu etọn lẹ pọ́n, Josẹfu ze kọfo fataka tọn etọn do saki he mẹ Bẹnjamini bẹ jinukun do bo sawhẹdokọna nọvisunnu etọn lẹ dọ yewlẹ wẹ fìn kọfo lọ. Whenue devizọnwatọ Josẹfu tọn lẹ mọ kọfo lọ to saki Bẹnjamini tọn mẹ, obu jẹ nọvisunnu etọn lẹ ji. Yé vẹ̀ Josẹfu dọ ni sayana yewlẹ kakati nido yin Bẹnjamini.

To whenẹnu, Josẹfu mọdọ nọvisunnu emitọn lẹ ko diọ. E masọ sọgan dava ede ba. E bẹ avi bo dọmọ: ‘Yẹn Josẹfu nọvisunnu mìtọn wẹ. Be otọ́ ṣie gbẹ́ pò togbẹ̀ ya?’ Nupaṣamẹ daho de wẹ e yin na nọvisunnu etọn lẹ. E sọ dọna yé dọmọ: ‘Mì ma dowhẹ mìde na nuhe mì wà na mi wutu blo. Jiwheyẹwhe wẹ do mi hlan fi nado whlẹn ogbẹ̀ mìtọn gán. Todin, mì yawu yì plan otọ́ ṣie wá.’

Yé lẹkọyi whé nado hẹn wẹndagbe enẹ yì na otọ́ yetọn bo plan ẹn wá Egipti. To owhe planplan enẹ lẹpo godo, Josẹfu po otọ́ etọn po wá gọ̀ yede mọ whladopo dogọ.