Samtang napriso si Jose, ang Paraon, ang hari sang Egipto, may mga damgo kag wala gid sing may makapaathag. Ang isa sa mga ulipon sang Paraon nagsugid sa iya nga mapaathag ni Jose ang iya mga damgo. Gani ginpatawag dayon sang Paraon si Jose.

Ginpamangkot sia sang Paraon: ‘Mapaathag mo bala ang akon mga damgo?’ Si Jose nagsiling sa Paraon: ‘May pito ka tuig nga madamo sing pagkaon sa Egipto, dayon may pito naman ka tuig nga tiggulutom. Magpili ka sang isa ka tawo nga maalam nga magatipon sang pagkaon para indi magutman ang imo katawhan.’ Ang Paraon nagsabat: ‘Ikaw ang ginpili ko! Mangin ikaduha ka nga may pinakamataas nga posisyon sa Egipto!’ Paano nabal-an ni Jose ang buot silingon sang mga damgo sang Paraon? Ginbuligan sia ni Jehova.

Sa sulod sang pito ka tuig, nagtipon si Jose sing pagkaon. Dayon may tiggulutom sa bilog nga duta, subong sang ginsiling niya. Ang mga tawo sa lainlain nga lugar nagkadto kay Jose para magbakal sing pagkaon. Sang nabalitaan sang iya tatay nga si Jacob nga may pagkaon sa Egipto, ginpakadto niya didto ang iya napulo ka bata para magbakal.

Nagkadto kay Jose ang mga bata ni Jacob, kag nakilala niya dayon sila. Pero wala sia makilala sang iya mga utod. Nagyaub sila sa iya pareho sa damgo niya sang bata pa sia. Gusto mabal-an ni Jose kon nagbag-o na ang iya mga utod. Gani ginsilingan niya sila: ‘Mga espiya kamo. Gusto ninyo mabal-an kon paano ninyo kami mapierde.’ Nagsiling sila: ‘Indi ina matuod. Dose kami ka mag-utod kag halin  kami sa Canaan. Ang isa namon ka utod patay na, kag ang amon agot upod subong sang amon tatay.’ Si Jose nagsiling sa ila: ‘Pakadtua diri ang inyo manghod, para magpati ako sa inyo.’ Gani nagpauli sila.

Sang naubusan naman sing pagkaon ang pamilya ni Jacob, ginpakadto niya liwat ang iya mga bata sa Egipto. Pero gin-upod na nila ang ila agot nga si Benjamin. Para testingan ang iya mga utod, gintago niya ang iya kopa nga pilak sa sako ni Benjamin nga ginsudlan sang uyas kag ginpasibangdan niya sila nga nangawat. Sang nakita sang mga ulipon ni Jose ang kopa sa sako ni Benjamin, nakibot gid ang iya mga utod. Nakitluoy sila kay Jose nga sila na lang ang silutan imbes nga si Benjamin.

Nakita ni Jose nga nagbag-o na ang iya mga utod. Indi na gid niya mapunggan ang iya balatyagon. Naghibi sia kag nagsiling: ‘Ako ang inyo utod nga si Jose. Buhi pa bala si Tatay?’ Nakibot gid ang iya mga utod. Ginsilingan niya sila: ‘Indi kamo magkasubo sa ginhimo ninyo sa akon. Ginpadala ako sang Dios diri para indi kamo mapatay sa gutom. Dalidali kamo, dal-a ninyo diri si Tatay.’

Nagpauli sila para isugid sa ila tatay ang maayo nga balita kag para dal-on sia sa Egipto. Pagligad sang madamo nga tuig, makit-anay na gid man liwat si Jose kag si Tatay niya.