Ngunda Josef a ri mondeko, Farao, ombara yaEngipte wa rota oturoto tu tu ha ri nomumangurure. Umwe wovakarere vaFarao we mu raera kutja Josef ma yenene okumangurura omaheero woturoto twe. Farao wa isanisa Josef tjimanga.

Farao we mu pura a tja: ‘Ove mo yenene okumangurura oturoto twandje?’ Josef wa raera Farao a tja: ‘MoEngipte mamu kara novikurya ovingi oure wozombura hambombari nu ape kongorere ozombura hambombari zourumbu. Toorora omundu wozondunge me ku pwikire ovikurya kutja ovandu voye ave ha ṱondjara.’ Farao wa tja: ‘Ami mba toorora ove! Mo rire omundu omunamasa outjavari moEngipte!’ Josef aa tjiwa vi omaheero woturoto twaFarao? Jehova we mu vatera.

Mozombura zokombanda ya 7 nḓa kongorera ko, Josef wa pwika ovikurya. Nu pa kara ourumbu mouparanga wouye auhe otja Josef pa heya. Ovandu aave zu koṋa akuhe okuyekuranda ovikurya ku Josef. Ihe, Jakob, wa zuva kutja kuna ovikurya koEngipte, okutja wa hinda ovazandu ve 10 ngo kutja ve karande ovikurya.

Ovazandu vaJakob va ya ku Josef ngwe ve zemburuka tjimanga. Posiya omarumbi we kaaye tjiwa kutja oJosef. Owo ve rikotamena ku ye tjimuna Josef tja rota indu tja ri omuṱiṱi. Josef aa vanga okutjiwa kutja omarumbi we nga ngunda ve nonyengo poo indee. Eye wa tja ku wo: ‘Oweṋe ovatare vehi. Eṋe mwe ya okutara ehi retu pu ri ri epupu.’ Owo va tja: ‘Kako! Eṱe twari ovazandu 12 moKanaan.  Omuangu wetu umwe wa ṱa, nu ingwi ongero uri puna Tate.’ Josef wa tja: ‘Kaeteye omuangu weṋu ngo ku ami, otjimekambura mu eṋe.’ Nowo otji va yaruka konganda.

Eṱunḓu tji ra mana ovikurya rukwao, Jakob wa hinda ovazandu ve rukwao koEngipte. Motjikando hi va twaerera Benjamin, ongero yawo. Mokurora omarumbi we, Josef wa horeka ekopi re esilveri mondjaṱu yaBenjamin yovikokotwa kutja ma kuminine omarumbi we kutja omba vaka. Indu ovakarere vaJosef tji va muna ekopi mondjaṱu yaBenjamin, omarumbi we ya urumine tjinene. Owo ve riheka ku Josef kutja me ve vere mena raBenjamin.

Nambano Josef wa tjiwa kutja omarumbi we ya rundurura ongaro yawo. Josef kaa yenene okutjaera omahoze we rukwao. Eye wa uta okurira tjinene na tja: ‘Owami Josef, omuangu weṋu. Tate u nomuinyo ngamba?’ Omarumbi we va kumwa tjinene. Eye wa tja: ‘Amu ṱoruhoze mena roviṋa mbi mwa tjita ku ami. Mukuru we ndji hinda ngwi kutja mbi yame omiinyo vyeṋu. Nambano hakahaneye mu kaete tate nguno.’

Owo va ya konganda nave karaera ihe ombuze ombwa ndji nokukemueta koEngipte. Kombunda yozombura ozengi tjinene, Josef na ihe va kara pamwe rukwao.