Yosep htawng hkrat nga ai shaloi, Egutu hkawhkam Hpara-u gaw yupmang mu ai. Kadai mung dai yupmang hpe n lu hkai dan ai. Yosep chyawm gaw, yupmang hpe hkai dan lu na re nga nna Hpara-u hpe shi a mayam langai tsun dan ai. Hpara-u gaw kalang ta Yosep hpe shaga la ai.

Hpara-u shi hpe ndai hku san ai: ‘Nye yupmang hpe hkai dan lu na kun?’ Yosep gaw Hpara-u hpe ndai hku bai tsun ai: ‘Egutu mung hta nai mam law law lu ai sanit ning hte hku hku ai sanit ning nga wa na. Hpaji rawng ai masha langai lata nna nai mam mahkawng da u. Dai rai yang, na a masha ni kawsi hkrum na n re.’ Hpara-u bai tsun ai: ‘Ngai nang hpe lata sai. Nang gaw Egutu mung hta nambat lahkawng ahkaw ahkang kaba htum ai wa rai na.’ Hpara-u mu ai yupmang a lachyum hpe Yosep gara hku chye ai kun? Yehowa gaw Yosep hpe karum ya ai majaw re.

Sanit ning laman, Yosep gaw lu sha mahkawng wa ai. Dai hpang, Yosep tsun wa ai hte maren, mungkan ting hta hku hku wa ai. Shara shagu hta na masha ni gaw, Yosep kaw lu sha sa mari ma ai. Shi kawa Yaku gaw, Egutu mung hta lu sha nga ai hpe na ai majaw, kasha marai shi hpe lu sha nkau mi sa mari na matu shangun dat ai.

Yaku a kasha ni gaw Yosep hpang de sa wa ai. Yosep gaw mu ai hte kalang ta shanhte hpe matsing ai. Raitim, shi kahpu ni gaw Yosep re ai hpe n chye ma ai. Shi kaji ai aten hta mu wa ai yupmang zawn, shi kahpu ni gaw shi a shawng hta dingnyawm ma ai. Shi a kahpu ni n ju ai myit naw nga ai kun? ngu ai hpe Yosep chye mayu ai. Dai majaw shi ndai hku tsun ai: ‘Nanhte gaw kin-yu ni re. Anhte mungdan a n-gun kya ai lam hpe sa sagawn ai ni re.’ Shanhte gaw: ‘N re. Anhte gaw Hkanan mung hta na hpunau 12 re. Kanau langai gaw n nga mat sai. Kaji htum gaw anhte a kawa hte nga da ai.’ Yosep ndai hku bai tsun ai:  ‘Nanhte a kanau kaji htum wa hpe ngai hpang de shaga sa wa rit. Rai yang, ngai nanhte hpe kam na.’ Dai majaw, shanhte nta de bai wa mat ai.

Shanhte a lu sha ni bai ma mat ai hpang, Yaku gaw shi kasha ni hpe Egutu de bai sa shangun ai. Ndai kalang gaw, kaji htum kanau Bin-yamin hpe shanhte hte arau woi sa mat wa ai. Shi kahpu ni hpe chyam na matu, Yosep gaw shi a gumhpraw gawm hpe Bin-yamin a nhpye hta bang dat ya ai. Dai gawm hpe lagu mat wa ai ngu nna shi kahpu ni hpe mara shagun ai. Yosep a mayam ni gaw, Bin-yamin a nhpye hta gawm hpe mu tam ai shaloi, shi kahpu ni grai myit kahpra mat ai. Bin-yamin a malai shanhte hpe dam jaw na matu Yosep hpe hpyi shawn ai.

Shi a kahpu ni galai shai mat sai hpe Yosep chye mat ai. Yosep gaw shi a hkamsha lam hpe matut nna n lu sharang sai. Shi myi prwi si pru let ndai hku tsun ai: ‘Ngai gaw nanhte a kanau Yosep re. Nye kawa asak naw hkrung nga ai kun?’ Shi a kahpu ni grai mau mat ai. Shi shanhte hpe ndai hku tsun ai: ‘Nye ntsa galaw wa ai lam ni a majaw, myit n pyaw hkum rai. Nanhte hpe hkye la na matu Karai Kasang ngai hpe ndai de shangun dat ai re. Ya lawan dik ai hku nna, nye wa hpe ndai de shaga sa wa marit.’

Shanhte nta de bai wa nna, kawa hpe kabu gara shiga ni tsun dan ai. Kawa hpe Egutu mung de woi sa wa ai. Shaning ni grai na ai hpang she, Yosep gaw shi kawa hte arau bai lu nga ai.