Rĩrĩa Jusufu aarĩ njera, Firauni, Mũthamaki wa Misiri, nĩ aarotire iroto gũtaarĩ na mũndũ ũngĩahotire gũtaũra. Ndungata ĩmwe ya Firauni nĩ yamwĩrire atĩ Jusufu nĩ angĩahotire gũcitaũra. Nake Firauni akiuga Jusufu atwarũo kũrĩ we o hĩndĩ ĩyo.

Firauni aamũririe ũũ: ‘Hihi no ũhote kũndaũrĩra iroto?’ Nake Jusufu akĩmwĩra: ‘Nĩ gũgũkorũo na irio nyingĩ Misiri kwa ihinda rĩa mĩaka mũgwanja na thutha ũcio kũgĩe na ng’aragu mĩaka ĩngĩ mũgwanja. Thuura mũndũ ũmwe mũũgĩ aige irio nĩguo andũ matikanahũte.’ Firauni aamũcokeirie: ‘Nĩwe ndathuura! Nĩwe ũgũkorũo ũrĩ mũndũ wa kerĩ wathani-inĩ kuuma harĩ niĩ gũkũ Misiri!’ Jusufu aamenyire atĩa ũrĩa iroto cia Firauni cioigaga? Nĩ Jehova wamũteithĩtie.

Kwa ihinda rĩa mĩaka mũgwanja ĩrĩa yarũmĩrĩire, Jusufu nĩ aaigire irio. Gwacokire gũkĩgĩa na ng’aragu thĩinĩ wa thĩ o ta ũrĩa Jusufu oigĩte. Andũ moimaga kũndũ guothe nĩguo menderio irio nĩ Jusufu. Jakubu, ithe wa Jusufu, nĩ aaiguire atĩ Misiri kwarĩ na irio, na nĩ ũndũ ũcio agĩtũma ariũ ake ikũmi makagũre irio kuo.

Ariũ a Jakubu nĩ maathire kũrĩ Jusufu na akĩmamenya, no o matiamũmenyire. Nĩ maamũinamĩrĩire o ta ũrĩa aarotete arĩ mũnini. Jusufu nĩ eendaga kũmenya kana ariũ a ithe no maamũthũire. Nĩ ũndũ ũcio akĩmeera: ‘Inyuĩ mũkĩte gũtuĩria. Mũrenda kũmenya ũrĩa bũrũri witũ ũtariĩ.’ Makĩmwĩra: ‘Aca! Tũrĩ anake 12 a ithe ũmwe kuuma Kanaani. Ũmwe nĩ aakuire, nake  ũrĩa mũnini matigĩtwo na baba.’ Jusufu aacokire akĩmeera: ‘Thiĩi mũgĩre ũcio mũnini nĩguo njĩtĩkie ũguo mũroiga.’ Nĩ ũndũ ũcio magĩthiĩ kũrĩ ithe.

Rĩrĩa maaninire irio iria maarĩ nacio, Jakubu nĩ amatũmire Misiri rĩngĩ. Hĩndĩ ĩyo nĩ maathire na mũrũ wa ithe ũrĩa mũnini wetagwo Benjamini. Nĩguo Jusufu agerie kana ariũ a ithe nĩ maaigĩte ũthũ ngoro-inĩ, nĩ aaikirie gĩkombe gĩake kĩa betha ikũnia-inĩ rĩa irio rĩa Benjamini, agĩcoka akiuga nĩo maaiyĩte. Hĩndĩ ĩrĩa ndungata cia Jusufu cionire gĩkombe ikũnia-inĩ rĩa Benjamini, ariũ a ithe nĩ maamakire mũno. Maathaithire Jusufu amaherithie handũ ha kũherithia Benjamini.

Hĩndĩ ĩyo Jusufu nĩ aamenyire atĩ ariũ a ithe nĩ maacenjetie. Ũndũ ũcio nĩ wamũhutirie mũno nginya akĩremwo kwĩgirĩrĩria. Aarĩrire na akiuga ũũ: ‘Niĩ nĩ niĩ Jusufu, mũrũ wa ithe wanyu. Baba arĩ o muoyo?’ Ariũ a ithe nĩ maamakire mũno. Aameerire: ‘Mũtikaigue ũũru nĩ ũndũ wa ũrĩa mwanjĩkire. Ngai aandũmire gũkũ nĩguo ngaamũhonokia. Thiĩi na ihenya mũgĩĩre baba.’

Maacokire mũciĩ kwĩra ithe wao ũhoro ũcio makĩmuoyaga nĩguo mamũtware Misiri. Jusufu nĩ maacemanirie na ithe rĩngĩ thutha wa mĩaka mĩingĩ.