Fimbo Josef a li modolongo, Farao ohamba yaEgipti okwa li a twa eendjodi ndele kape na nande oo a li a dula oku di fatulula. Opo nee omupiya waFarao umwe okwa li e mu lombwela kutya Josef ota dulu okufatulula eendjodi daye. Farao okwa li a tuma Josef a ka talwe meendelelo.

Farao okwa li a lombwela Josef ta ti: ‘Fatululile nge eendjodi dange.’ Josef okwa li a lombwela Farao ta ti: ‘MuEgipti otamu ka kala oikulya ya wana omido heyali, notaku ka landula omido heyali dondjala. Hoolola omulumenhu omunaendunge a kale ta ongele oikulya opo ovanhu vaha fye ondjala.’ Farao okwa nyamukula ta ti: ‘Onde ku hoolola! Oto ka kala omulumenhu omutivali omunaenghono muEgipti.’ Josef okwa shiiva ngahelipi omafatululo eendjodi daFarao? Jehova oye a li a kwafela Josef.

Josef okwa kala ta ongele oikulya oule womido heyali da ka landula ko. Ngaashi naanaa Josef a popile, konima yomido heyali okwa ka kala ondjala kombada yedu alishe. Ovanhu ova li tava di keshe pamwe tave uya okulanda oikulya kuJosef. Jakob, xe yaJosef, okwa li a uda kutya muEgipti omu na oikulya, onghee okwa li a tuma ko ovanamati vaye omulongo va ka lande oikulya.

Ovanamati vaJakob ova li va ya kuJosef, na Josef okwa li e va dimbuluka diva. Ashike ovamwaxe kava li ve mu dimbuluka ngeenge oJosef. Ova li ve mu twila eengolo, ngaashi naanaa a twile ondjodi fimbo a li okamatyona. Josef okwa li a hala okushiiva ngeenge natango ovamwaxe ove na omhepo youtondwe, nomolwaasho okwa li e va lombwela a ti: ‘Nye eendadi. Omwa hala okutala apa oshilongo shetu sha heva.’ Opo nee ove mu nyamukula tava ti: ‘Ahowe, otu li ovamwainamati 12 twa dja kuKanaan. Omumwamememati umwe okwa fya, naau munini kufye oku li natate.’ Opo nee Josef okwe va  nyamukula ta ti: ‘Eteni omumwanyoko ou munini opo ndi dule oku mu itavela nawa.’ Okudja opo, ova shuna keumbo kuxe.

Eshi oukwaneumbo waJakob wa ka kala vali wa pumbwa oikulya, okwa tuma natango ovanamati vaye kuEgipti. Pomhito opo ova li va ya pamwe naBenjamin oo munini. Josef okwa li a yeleka ovamwaxe eshi a holeka eholo laye loshisilveri mekutu loilya laBenjamin ndele te va lundile kutya ove li vaka po. Eshi ovapiya vaJosef va hanga eholo olo mekutu laBenjamin, ovamwaxe ova li va haluka unene. Ova li va pula Josef opo ngeno e va futife, ponhele yaBenjamin.

Oshiningwanima osho osha li sha kwafela Josef a mone kutya ovamwaxe ova lundulula oikala yavo. Josef ka li ta dulu vali okupangela omaliudo aye. Okwa li a hovela okulila, ndele ta ti: ‘Aame Josef, omumwaxo. Tate oku na ngoo natango omwenyo?’ Ovamwaxe ova li va kumwa neenghono. Okwe va lombwela ta ti: ‘Inamu lipa oushima eshi mwa li mwa landifa nge po. Kalunga okwa tuma nge oku opo ndi xupife eemwenyo deni. Paife indeni diva ndele tamu eta tate oku.’

Opo nee ova ya keumbo nokulombwela xe onghundana iwa ndele tave mu twala kuEgipti. Josef naxe ova ka kala pamwe natango nonande opa li pa pita omido dihapu.