We Josɛf bin de na prizin, Fɛro, we na di kiŋ na Ijipt bin drim wan drim we nɔbɔdi nɔ bin ebul fɔ ɛksplen. Wan pan Fɛro in savant dɛn bin tɛl am se Josɛf go ebul tɛl am wetin in drim min. Wantɛm wantɛm, Fɛro sɛn pɔsin fɔ kɔl Josɛf.

Fɛro aks am se: ‘Yu go ebul ɛksplen wetin a drim?’ Josɛf tɛl Fɛro se: ‘Fɔ sɛvin ia, bɔku it go de na Ijipt, ɛn fɔ ɔda sɛvin ia, bad bad angri go de. Pik sɔmbɔdi we gɛt sɛns fɔ kip it so dat angri nɔ go kil yu pipul dɛn.’ Fɛro tɛl am se: ‘Na yu a pik! Yu go bi di sɛkɔn pawaful man na Ijipt!’ Aw Josɛf bin no wetin Fɛro in drim min? Na Jiova bin ɛp am.

Insay di sɛvin ia we it bin de, Josɛf bin kip bɔku it. Dɔn bad bad angri bin de na di wan ol wɔl, jɔs lɛk aw Josɛf bin se. Pipul dɛn bin de kɔmɔt ɔlsay fɔ kam bay it to Josɛf. In papa, Jekɔp, bin yɛri se it de na Ijipt, so i sɛn in tɛn bɔypikin dɛn fɔ go bay.

Jekɔp in bɔypikin dɛn bin go to Josɛf, ɛn as i si dɛn so, i mɛmba dɛn. Bɔt in brɔda dɛn nɔ bin no se na Josɛf. Dɛn bin butu bifo am, jɔs lɛk aw i bin dɔn drim we i bin smɔl. Josɛf bin want fɔ no if in brɔda dɛn dɔn chenj. So i tɛl dɛn se: ‘Una na spay dɛn. Una kam fɔ no usay una go ebul fɔ atak wi kɔntri.’ Dɛn tɔk se: ‘Nɔ! Wi na 12 brɔda dɛn we kɔmɔt na Kenan. Wan pan wi brɔda dɛn bin dɔn day, ɛn di las wan de wit wi papa.’  Josɛf tɛl dɛn se: ‘Una go kam wit una smɔl brɔda, ɛn a go biliv una.’ So dɛn bin go na os to dɛn papa.

We dɛn famili nɔ bin gɛt tin fɔ it igen, Jekɔp bin sɛn in bɔypikin dɛn bak fɔ go na Ijipt. Dis tɛm, dɛn go wit Bɛnjamin we na dɛn las brɔda. Fɔ tɛst in brɔda dɛn, Josɛf ayd wan silva kɔp insay Bɛnjamin in bag, ɛn i se in brɔda dɛn dɔn tif am. We Josɛf in savant dɛn bin fɛn di kɔp insay Bɛnjamin in bag, in brɔda dɛn bin sɔprayz. Dɛn beg Josɛf fɔ lɛ i nɔ pɔnish Bɛnjamin, bifo dat, lɛ i pɔnish dɛn.

Dat bin mek Josɛf no se in brɔda dɛn dɔn chenj. Josɛf nɔ bin ebul fɔ ayd di we aw i de fil igen. I bɔs kray ɛn se: ‘Mi na una brɔda Josɛf. Mi papa stil de alayv?’ In brɔda dɛn bin rili sɔprayz. I tɛl dɛn se: ‘Una nɔ fil bad bikɔs ɔf wetin una bin du to mi. Gɔd sɛn mi na ya fɔ mek a go sev una layf dɛn. Naw una go kwik ɛn briŋ mi papa na ya.’

Dɛn go na os fɔ go tɛl dɛn papa di gud nyuz ɛn dɛn go wit am na Ijipt. Afta lɔng tɛm, Josɛf ɛn in papa bin ebul fɔ de bak togɛda.