တၢ်မၤလိ ၁၅
ယဟိဝၤယွၤတသးပ့ၤနီၣ် စီၤယိၤသးနီတဘျီဘၣ်
ဖဲစီၤယိၤသးအိၣ်လၢဃိာ်ပူၤအဆၢကတီၢ် အဲၤကူပတူးအစီၤပၤဖၤရိၤ မံမီၢ်ဝဲတၢ်မံမီၢ်တဖၣ်လီၤ. ဘၣ်ဆၣ် ပှၤတဲဘၣ်အီၤအခီပညီတဘၣ်ဝဲနီတဂၤဘၣ်. ဖဲန့ၣ်အဆၢကတီၢ် ဖၤရိၤအပျဲၢ်အဘီၣ်တဂၤတဲဘၣ်အီၤလၢ စီၤယိၤသးတဲဖျါထီၣ် စီၤပၤအတၢ်မံမီၢ်အခီပညီသ့ဝဲလီၤ. တဘျီဃီန့ၣ် စီၤပၤဖၤရိၤမၢပှၤလဲၤ ထုးထီၣ်စီၤယိၤသးလၢ ဃိာ်ပူၤလီၤ.
စီၤပၤဖၤရိၤ သံကွၢ်စီၤယိၤသးလၢ– ‘ဘၣ်ဃးဒီး ယတၢ်မံမီၢ်န့ၣ် နတဲပၠးယၤအခီပညီကသ့ဧါ.’ စီၤယိၤသးတဲဘၣ်ဖၤရိၤလၢ– ‘နွံနံၣ်အတီၢ်ပူၤန့ၣ် ကီၢ်အဲၤကူပတူး ကအိၣ်ဒီးတၢ်အီၣ်တၢ်အီလၢလၢပှဲၤပှဲၤလီၤ. ဝံၤဒီးတၢ်သၣ်ဝံၤလီၤဒိ ကအိၣ်ထီၣ်ဝဲနွံနံၣ်စ့ၢ်ကီးလီၤ. အဃိ ဃုထၢထီၣ်ပှၤကူၣ်တၢ်သ့တဂၤလၢ ကပာ်ဖှိၣ်ဃာ်ဝဲ တၢ်အီၣ်တၢ်အီလၢ နထံဖိကီၢ်ဖိအဂီၢ်သၢၣ်.’ စီၤပၤဖၤရိၤတဲဆၢက့ၤအီၤလၢ– ‘ယဃုထၢထီၣ်နၤလီၤ. နကကဲထီၣ် ပှၤအစိကမီၤဒိၣ်ကတၢၢ်ခံဂၤတဂၤလၢ ကီၢ်အဲၤကူပတူးအပူၤလီၤ.’ စီၤပၤဖၤရိၤအတၢ်မံမီၢ်န့ၣ် စီၤယိၤသးသ့ၣ်ညါဝဲအခီပညီသ့ဒ်လဲၣ်. မ့ၢ်လၢယဟိဝၤယွၤ မၤစၢၤအီၤအဃိလီၤ.
ဆူညါနွံနံၣ်အတီၢ်ပူၤန့ၣ် စီၤယိၤသးပာ်ဖှိၣ်ဝဲ တၢ်အီၣ်တၢ်အီအါအါဂီၢ်ဂီၢ်လီၤ. ဝံၤဒီး တၢ်သၣ်ဝံၤလီၤဒိအိၣ်ထီၣ်ဝဲလၢ ဟီၣ်ခိၣ်ဒီဘ့ၣ်ဒ် စီၤယိၤသးတဲဆိပာ်ဝဲအသိးလီၤ. ဒီးပှၤအိၣ်လၢတၢ်လီၢ်ကိးပူၤဒဲးန့ၣ် ဟဲပှ့ၤတၢ်အီၣ်တၢ်အီလၢ စီၤယိၤသးအအိၣ်လီၤ. စီၤယိၤသးအပၢ်စီၤယၤကိာ်နၢ်ဟူဘၣ်ဝဲလၢ ကီၢ်အဲၤကူပတူးအပူၤန့ၣ် တၢ်အီၣ်တၢ်အီအိၣ်ဝဲအါအါဂီၢ်ဂီၢ်လီၤ. အဃိ အဝဲမၢလီၤဝဲအဖိခွါအဂၤ ၁၀ လဲၤပှ့ၤတၢ်အီၣ်တၢ်အီလၢ ကီၢ်အဲၤကူပတူးအပူၤလီၤ.
ဖဲစီၤယၤကိာ်အဖိခွါတဖၣ် လဲၤဝဲဆူစီၤယိၤသးအအိၣ်အခါ စီၤယိၤသးကွၢ်နီၣ်အဝဲၢ်ခွါတဖၣ် ဘၣ်တဘျီဃီလီၤ. မ့မ့ၢ်အဝဲၢ်ခွါတဖၣ်န့ၣ် ကွၢ်နီၣ်ဝဲစီၤယိၤသးတဘၣ်ဘၣ်. အဝဲသ့ၣ်တီၤလီၤအခိၣ်လၢ စီၤယိၤသးအမဲာ်ညါဒ် စီၤယိၤသးမံမီၢ်တ့ၢ်ဝဲလၢညါအသိးလီၤ. ဒီးစီၤယိၤသး အဲၣ်ဒိးသ့ၣ်ညါဝဲလၢ မ့ၢ်အဝဲၢ်ခွါတဖၣ်န့ၣ် အိၣ်ဒီးတၢ်သူၣ်က့ၣ်သးက့ၣ်ဒံးဧါ. အဃိ စီၤယိၤသးတဲဘၣ်အဝဲၢ်ခွါတဖၣ်လၢ– ‘သုအဲၣ်ဒိးသ့ၣ်ညါလၢ ပထံပကီၢ်အံၤအတၢ်ဂံၢ်စၢ်ဘါစၢ် အိၣ်ဒ်လဲၣ်အဃိ သုဟဲကွၢ်ဟုၣ်တၢ်လီၤ.’ အဝဲၢ်ခွါတဖၣ်တဲဆၢက့ၤအီၤလၢ– ‘တမ့ၢ်ဘၣ်, ပအိၣ်ဟဲလၢ ကီၢ်ကနၤဧၣ်အပူၤ ဒီးပဒီပုၢ်ဝဲၢ်ခွါအိၣ်ဝဲ ၁၂ ဂၤလီၤ. လၢပဒီပုၢ်ဝဲၢ်အကျါန့ၣ် သံဝဲတဂၤလံ. မ့မ့ၢ်အသဒါတဂၤန့ၣ် အိၣ်တ့ၢ်ဒီး ပပၢ်လၢဟံၣ်လီၤ.’ ဝံၤဒီး စီၤယိၤသးတဲဝဲလၢ– ‘သုမ့ၢ်အဲၣ်ဒိးလၢ ယကနာ်သုတၢ်ကတိၤန့ၣ် ဟဲကိးသုပုၢ်သဒါဆူယအိၣ်တက့ၢ်.’ ဝံၤဒီးအဝဲၢ်ခွါတဖၣ် က့ၤဝဲဆူအတၢ်လီၢ်တၢ်ကျဲလီၤ.
ဖဲအဝဲသ့ၣ်ဟံၣ်ဖိဃီဖိ အတၢ်အီၣ်တၢ်အီလၢာ်ဝဲအခါ စီၤယၤကိာ်ပျဲလီၤကဒီး အဖိခွါဆူကီၢ်အဲၤကူပတူးအပူၤလီၤ. တဘျီအံၤ အဝဲသ့ၣ်လဲၤကိးဃုာ်ဒီး အပုၢ်သဒါစီၤဘံၣ်ယၤမံၣ်လီၤ. ဒ်သိးစီၤယိၤသးကမၤကွၢ် အဒီပုၢ်ဝဲၢ်တဖၣ်အဂီၢ် အဝဲပာ်လီၤခူသူၣ်အထံခွးစ့လၢ စီၤဘံၣ်ယၤမံၣ်အဘုသးထၢၣ်ပူၤလီၤ. ဝံၤဒီး စီၤယိၤသးတဲဝဲလၢ အဒီပုၢ်ဝဲၢ်တဖၣ်ဟုၣ်ဝဲ အထံခွးစ့လီၤ. ဖဲစီၤယိၤသးအခ့အပှၤတဖၣ် ထံၣ်န့ၢ်ဝဲထံခွးစ့လၢ စီၤဘံၣ်ယၤမံၣ်အထၢၣ်ပူၤအခါ အဝဲၢ်ခွါတဖၣ် ဖုးဘၣ်အသးဖးဒိၣ်လီၤ. ဒီးစီၤယိၤသးအဝဲၢ်ခွါတဖၣ် ဃ့ကညးအီၤလၢ အဝဲသ့ၣ်ကတူၢ်တၢ်စံၣ်ညီၣ်လၢ စီၤဘံၣ်ယၤမံၣ်အလီၢ်လီၤ.
ခဲအံၤ စီၤယိၤသးသ့ၣ်ညါဝဲလၢ အဝဲၢ်ခွါတဖၣ်အတၢ်ပာ်သူၣ်ပာ်သးန့ၣ် ဆီတလဲဝဲလံ. စီၤယိၤသး ပၢၤအသး တန့ၢ်လၢၤဘၣ်အဃိ အဝဲဟီၣ်ဝဲလီၤ. ဒီးစီၤယိၤသးတဲဘၣ်အဝဲသ့ၣ်လၢ– ‘ယမ့ၢ်သုဒီပုၢ်ဝဲၢ်ခွါစီၤယိၤသးလီၤ. မ့ၢ်ယပၢ်အိၣ်မူဒံးဧါ.’ စီၤယိၤသးအဒီပုၢ်ဝဲၢ်တဖၣ် ဖုးဝဲလီၤ. ဒီးစီၤယိၤသးတဲဘၣ်အဒီပုၢ်ဝဲၢ်လၢ– ‘တဘၣ်သးဘၣ်ဒိလၢ သုဆါလီၤကွံာ်ယၤအဃိတဂ့ၤ. ကစၢ်ယွၤဆှၢလီၤယၤဖဲအံၤလၢ ကမၤပူၤဖျဲးသုသးသမူအဂီၢ်လီၤ. ခဲအံၤ က့ၤကိးယပၢ်ဒီး ဟဲကိးအီၤဖဲအံၤတက့ၢ်.’
ဖဲစီၤယိၤသးအဒီပုၢ်ဝဲၢ်တဖၣ် က့ၤတုၤလၢဟံၣ်အခါ အဝဲသ့ၣ်တဲဘၣ်အပၢ်လၢ စီၤယိၤသးအဂ့ၢ်လီၤ. ဝံၤဒီး လဲၤကိးဝဲအပၢ်ဆူ ကီၢ်အဲၤကူပတူးအပူၤလီၤ. စီၤယိၤသးဘၣ်အိၣ်လီၤဖးဒီးအပၢ် ဖးယံာ်လံ. ဘၣ်ဆၣ် ခဲအံၤန့ၣ် အဝဲအိၣ်ဘၣ်ကဒါက့ၤဒီးအပၢ်တပူၤဃီလီၤ.
“သုမ့ၢ်တပျၢ်ကွံာ်ဘၣ် ပှၤကညီ အလီၤကမၣ်တၢ်ဒီး, သုပၢ်တပျၢ်ကွံာ်စ့ၢ်ကီး သုလီၤကမၣ်တၢ်ဘၣ်.”—မးသဲ ၆:၁၅
