Vava Yosefe kakala muna Pelezo, Faro wa ntinu a Engipito, walota e ndozi. Ke vakala muntu ko walenda yo sasila. Mosi muna selo yandi wavovesa Faro vo Yosefe olenda sasila e ndozi kalotele. Vana vau, Faro watumisa Yosefe muna pelezo.

Faro wayuvula Yosefe vo: ‘Nga olenda sasila e ndozi zame?’ Yosefe wavovesa Faro vo: ‘Madia mayingi mekala mu Engipito yawonso mu kolo kia mvu nsambwadi. I bosi, mvu nsambwadi mia mvengele milanda. Muna kuma kiaki, sola nkwa ngangu kalunda madia kimana nkangu aku walembi fwa ye nzala.’ Faro wavutula vo: ‘Ngeye nsolele. Okituka muntu anzole omu Engipito.’ Aweyi Yosefe kazayila e nsas’a ndozi zalota Faro? Yave wasadisa Yosefe mu sasila ndozi.

Mu kolo kia mvu nsambwadi, Yosefe walunda madia mayingi. I bosi, e mvu mia mvengele miayantika, nze una Yosefe kavova. Wantu batukanga mu nsi zayingi mu kwiza sumba madia kwa Yosefe. Vava Yakobo wa se diandi kawá vo madia mena kuna Engipito, watuma wan’andi kumi mu kwenda sumba madia kuna Engipito.

Vava wan’a Yakobo balwaka kuna Engipito, Yosefe wabasungamena vana vau. Kansi, e mpangi zandi ke basungamena Yosefe ko. Bavumbamena Yosefe nze una kalota muna ndozi vava kakala nleke. Yosefe wazola zaya kana vo mpangi zandi bakinu wantu ambi. Muna kuma kiaki, wabavovesa vo: ‘Oyeno nu alangi. Nsi eto nuizidi langa.’ Bavova vo: ‘Ve, ke tu alangi ko. Ku nsi a Kenani tutukidi. Wana 12 twawutuka. Mosi wafwa, ona  wansuka osidi yo se dieto.’ I bosi, Yosefe wavova vo: ‘Avo nutwese nleke eno ona wansuka, i bosi ikwikila muna mvovo mieno.’ Muna kuma kiaki, bavutuka kwa se diau.

Vava madia mafokoka, Yakobo watuma diaka wan’andi kuna Engipito. O nkumbu wau, banete Benyamini wa mbunzi au. Muna tonta mpangi zandi, Yosefe wasia e mbungw’andi ya palata muna nkutu a madia ya Benyamini. I bosi, wavova vo: ‘E mbungw’ame a palata bayiyidi yo, nutala muna nkutu zau.’ Vava ntaudi za Yosefe basolola e mbungwa muna nkutu a Benyamini, mpangi zandi bakendalala kikilu. Badodokela Yosefe vo kayambula Benyamini, kabavana e tumba vana fulu kia Benyamini.

Ediadi diakwikidisa Yosefe vo mpangi zandi basoba kikilu. Yosefe kalenda diaka kanga ntima ko. Wayantika dila yo vova vo: ‘Mono i Yosefe wa mpangi eno. O se diame nga wakinu moyo?’ E mpangi zandi basivika kikilu. Wabavovesa vo: ‘Ke nuyitumbi ko mu kuma kia dina nuampanga. Nzambi wantuma okwaku kimana yavuluza mioyo mieno. Owau nuenda, nuatwasa o se diame kwaku.’

Mpangi za Yosefe bavutuka kuna Kenani yo zayisa e nsangu zazi zambote kwa se diau. Yau awonso bayenda zingila kuna Engipito. Una vavioka mvu miayingi, Yosefe yo se diandi bavutuka zingila diaka vamosi.