Lino Jozefu wali mu cifungo, Falao umwene wa ku Ijipti walosile iviloto vimwi vino yonsi yafizilwe ukulondolola. Muomvi wenga wakwe Falao walanzile ukuti Jozefu angalondolola iviloto vivyo. Lilyo kwene sile Falao watumile aakuyaama Jozefu.

Falao uzizye Jozefu ati: ‘Uzye ungalondolola iviloto vyane?’ Jozefu wanenyile Falao ati: ‘Mu Ijipti muli nu kuya ivyakulya ivingi pa myaka 7 nupya imyaka 7 ilalondelelapo mulaya inzala. Soolola umuntu umwi uwa mano uwakuti asunge ivyakulya pakuti antu yako yatakafwe ni nzala.’ Falao waswike ati: ‘Na soolola wewe kwene! Umaya umuntu wakwe ciili uwa maka mu Ijipti monsi!’ Uzye Jozefu wamanyile uli upiliulo wa viloto vyakwe Falao? Yeova u wazwilizye Jozefu.

Kucila pa myaka 7 iyalondelilepo, Jozefu wasunzile ivyakulya. Lyene kwizile ikuya icipowe mu nsi yonsi wakwe vino Jozefu walanzile. Antu ukufuma umu ncende izipusanepusane yayanga umukukala ivyakulya kuli Jozefu. Yakobo isi wakwe Jozefu, uvwile ukuti mu Ijipti mwali ivyakulya, fwandi watumile ana yakwe aonsi 10 kuti yakakale ivyakulya.

Ana yakwe Yakobo, yaile kuli Jozefu, wiyo uwayamanyile zuwa zuwa. Lelo aina yakwe yene yatamanyile ukuti wino yaileko a Jozefu. Yamufukamile wakwe vivikwene vino walosiile ala acili umwance. Jozefu walondanga ukumanya ndi cakuti aina yakwe yacili nu lupato. Fwandi wayanenyile ati: ‘Mwemwe inengu. Mukulonda mulole utonte wa mpanga itu pakuti mukize  mukatuzanze.’ Nayo yalanzile iyati: ‘Awe! Twaya 12 nupya tufumile uku Kenani. Umwina witu wenga wafwa nupya umwina witu umwancepo asiile kuli tata.’ Jozefu wayanenyile ati: ‘Mukalete umoto winu umwancepo, alino ndamutaila.’ Fwandi yaswililemo uku ng’anda kuli isi.

Lino ivyakulya vino yakazile vyasizile, Yakobo watumile ana yakwe aonsi ku Ijipti kuti yakakale vyuze. Umuku uu wene, yasenzile na Benjamini umuto wao. Pakuti Jozefu amanye ndi cakuti aina yakwe yasenwike, wayezizye lino watozile kapu yakwe siluva aika umu cola cakwe Benjamini ca vyakulya, nu kuyapeela umulandu wakuti iviile kapu wiyo. Lino aomvi yakwe Jozefu yazanyile kapu mu cola cakwe Benjamini, aina yakwe cayapezizye amano. Yapaapasile Jozefu ukuti apeele aliyo umulandu kucila ukupeela Benjamini.

Lyene Jozefu wamanyile ukuti aina yakwe yasenuka. Jozefu wafizilwe ukuzizimizya icakuti walizile nu kuyanena ati: ‘Nene umwina winu Jozefu. Uzye tata acili nu umi?’ Aina yakwe cayapezizye sana amano. Jozefu wayanenyile ati: ‘Mutuvwa uyi pali vino mwacisile kuli nene. Leza uwantumile kuno kuti mpususye ma umi inu. Fwandi pitisyini kaletini tata kuno.’

Yaswilile kuli isi nu kuyamunena ilyasi lii lisuma nupya yamusenzile ku Ijipti. Pa cisila ca myaka ingi, Jozefu na isi yaloline nupya.