Ke Josep ear pãd ilo kalbuuj, ear wal̦o̦k jet ettõn̦ak ko ñan Pero, kiiñ eo an Ijipt, ak ejjel̦o̦k juon ear maroñ in kwal̦o̦k ta mel̦el̦eier. Innem juon iaan rijerbal ro an ear ba ñane bwe Josep emaroñ kwal̦o̦k ta mel̦el̦ein ettõn̦ak ko an. Kõn men in, Pero ear ba bwe ren m̦õkaj im ãñintok Josep ñan ippãn.

Pero ear kajjitõk ippãn Josep im ba: ‘Kwõmaroñ ke kõmel̦el̦eik eõ ta mel̦el̦ein ettõn̦ak kein?’ Josep ear uwaak im ba: ‘Enaaj lukkuun lõñ m̦õñã ilo Ijipt ium̦win jimjuon iiõ, ak ãlikin wõt iiõ kein, enaaj wõr ñũta ium̦win bar jimjuon iiõ. Kwõn kããlõt juon em̦m̦aan eo emãlõtlõt bwe en ain im kakkon̦ m̦õñã, bwe armej ro am̦ ren jab naaj kwõle.’ Innem Pero ear ba: ‘Ij kããlõt kwe! Kwõnaaj juon rũtõl eo eutiej jãn aolep ilo Ijipt ijello̦kun wõt ña!’ Etke Josep ear maroñ jel̦ã kõn mel̦el̦ein ettõn̦ak ko an Pero? Ej kõnke Jeova ear jipañe.

Ium̦win iiõ ko jimjuon ke ear lukkuun lõñ m̦õñã, Josep ear ain im kakkon̦kon̦ ñan raan ko im̦aan. Innem ãlikin wõt iiõ kein, ear wõr ñũta ipel̦aakin lal̦ ãinwõt an kar Josep ba. Kõn men in, elõñ armej jãn aolep jikin ko rar itok ñan ippãn Josep im wia kijeer m̦õñã. Jekob, jemãn Josep, ear roñ bwe elõñ m̦õñã ilo Ijipt, innem ear jilkinl̦o̦k l̦õm̦aro 10 nejin bwe ren etal im wia kijeer.

Ke l̦õm̦aro nejin Jekob rar etal ñan ippãn Josep, Josep ear m̦õkaj an kile er. Ak l̦õm̦arein jein rar jab kile e. Rar badikdik ñane ãinwõt an kar Josep loe aer kõm̦m̦ane ilo ettõn̦ak ko an ke ear dik. Josep ear kõn̦aan jel̦ã ñe ejjañin jako aer dike e. Kõn men in, ear ba ñan er: ‘Kom̦ riaroñroñ. Kom̦ij kajjioñ in lale ia eo em̦õjn̦o̦ ilo aelõñ in ammim.’ Ak rar ba: ‘Ejjab!  Kõmeañ ej jemjati im kõmij itok jãn ãneen Kenan. Kar 12 kõmeañ, ak juon emej, im diktata eo epãd wõt ippãn jememmim.’ Innem Josep ear ba: ‘Kom̦win bõktok diktata en̦ jatimi, innem inaaj tõmak naan ko ami.’ Kõn men in, rar ro̦o̦l ñan ippãn jemãer ilo ãneo ãneer.

Ke ear mããt kijeer m̦õñã, Jekob ear bar jilkinl̦o̦k l̦õm̦aro nejin ñan Ijipt im ear kõtl̦o̦k bwe ren bõk Benjamin ippãer, diktata eo jatier. Josep ear kõn̦aan jel̦ã ñe l̦õm̦arein jein rar oktak, kõn men in ear n̦ooje juon cup jelba ilo iep in wiit eo an Benjamin, innem ear n̦arueer im ba bwe rar ko̦o̦te cup in. Ke rijerbal ro an Josep rar loe cup eo ilo iep eo an Benjamin, l̦õm̦aro jein rar ilbõk im lukkuun inepata. Rar akwel̦ap ñan Josep im ba bwe en kajeik er, ak en kõtl̦o̦k Benjamin.

Kiiõ Josep ej kab kile bwe em̦õj an l̦õm̦arein jein oktak. Kõnke ear jab maroñ wõnm̦aanl̦o̦k im n̦ooj bũruon, ear lukkuun jañ im ba: ‘Ña e Josep, l̦eo jatimi. Ej mour wõt ke jema?’ Innem l̦õm̦aro jein rar kanooj in bwilõñ. Ak Josep ear ba ñan er: ‘Kom̦win jab inepata ak n̦aruomi kõn men ko kom̦ar kõm̦m̦ani. Anij ear jilkintok eõ bwe in lo̦mo̦o̦ren kom̦. Kiiõ kom̦win m̦õkaj im ãñintok jema ñan ijin.’

Kõn men in, rar ro̦o̦l ñan ãneo ãneer im ba ñan jemãer kõn nuuj in em̦m̦an, im rar ãñinl̦o̦ke ñan Ijipt. Elõñ iiõ in an Josep kar jako jãn jemãn, ak kiiõ erro naaj bar iioon doon.