Veʼeka̱a ndíka̱a̱ ta̱ José tá ni̱xa̱ní ta̱ Faraón rey ñuu Egipto ta ni iinna kǒo níkunda̱a̱-ini xíʼinña. Tasaá iin ta̱ káchíñu nu̱ú ta̱ Faraón ni̱ka̱ʼa̱nra xa̱ʼa ta̱ José ña̱ kivi nakunira xa̱ni yóʼo. Ña̱kán ndi̱ku̱n ni̱ka̱ʼa̱n ta̱ Faraón xíʼinna ná ku̱ʼu̱nna xa̱ʼara.

Ta̱ Faraón ni̱nda̱ka̱tu̱ʼunra ta̱ José: “¿Á kivi ka̱ʼún xíʼi̱n ndáaña kúni̱ kachi ña̱ ni̱xa̱níi̱?”. Ta̱ José ni̱ka̱ʼa̱nra: “U̱xa̱ ku̱i̱ya̱ kúú ña̱ kooní ña̱ʼa kuxundó ñuu Egipto, ta u̱xa̱ ku̱i̱ya̱ kooní so̱ko. Ndukú iin ta̱a ta̱ ndíchi ta ná taán va̱ʼara ña̱ʼa ña̱ kuxundó ña̱ va̱ʼa ná kǒo kuvindó so̱ko”. Tasaá ni̱ka̱ʼa̱n ta̱ Faraón: “Yóʼó kúú ta̱ ndáka̱xi̱i̱n. Ta xa̱ún koún iin ta̱a ta̱ káʼnuní ñuu Egipto ta̱ ndíku̱n sa̱tái̱ koún”. Soo ¿ndáa xa̱ʼa kúúña va̱ʼaní na̱kunda̱a̱-ini ta̱ José xíʼin ña̱ ni̱xa̱ní ta̱ Faraón? Chi mií Jehová chi̱ndeé táʼan xíʼinra.

U̱xa̱ ku̱i̱ya̱ kúúña nda̱kaya ta̱ José ña̱ kuxuna. Tasaá ki̱xaʼá íyo so̱ko táki̱ʼva ni̱ka̱ʼa̱nra, ta ku̱a̱ʼánína ni̱xa̱ʼa̱n nu̱úra ña̱ satána ña̱ kuxuna. Yivára ta̱ Jacob na̱kunda̱a̱-inira ña̱ íyo ña̱ʼa kuxuna chí ñuu Egipto ta chi̱ndaʼára 10 se̱ʼera ña̱ ku̱a̱ʼa̱nna satána ña̱ kuxuna.

Na̱ se̱ʼe ta̱ Jacob ni̱xa̱ʼa̱nna nu̱ú ta̱ José, ta ndi̱ku̱n nda̱kunirana. Soo na̱yóʼo kǒo níndakuninara. Ta ki̱xaʼána xi̱kuxítína nu̱úra táki̱ʼva ni̱xa̱níra tá loʼora. Ta̱yóʼo kúni̱ra kunda̱a̱-inira á sáa̱kana xíninara, ta ni̱ka̱ʼa̱nra xíʼinna: “Ndóʼó va̱xindó koto se̱ʼéndó ñuundi̱ ña̱ va̱ʼa kunindó ndáa ki̱ʼva íyondi̱”. Tasaá nda̱kuiinna: “Su̱ví na̱ va̱xi koto se̱ʼé kúúndi̱. Ñuu Canaán ke̱endi̱ ta 12 xi̱kuundi̱, soo ni̱xi̱ʼi̱va iinra  ndáa ta̱ loʼo kúú ta̱ ni̱ndo̱o xíʼin yivándi̱”. Saá ni̱ka̱ʼa̱n ta̱ José: “Kúaʼanndó xa̱ʼa ta̱ loʼo ñanindó ná kixira xíʼinndó ta saá kandíxai̱ ndóʼó”. Xa̱ʼa ña̱yóʼo ndi̱kó tukuna ku̱a̱ʼa̱nna.

Ndi̱ʼi tuku ña̱ kuxu na̱ veʼe ta̱ Jacob, ta xa̱ʼa ña̱yóʼo chi̱ndaʼá tukura na̱ se̱ʼera ku̱a̱ʼa̱nna chí ñuu Egipto. Ta vitin ku̱a̱ʼa̱n ta̱ Benjamín xíʼinna. Ña̱ va̱ʼa kunda̱a̱-ini ta̱ José á xa̱a̱ na̱sama na̱ ñanira, chi̱ka̱a̱ se̱ʼéra iin copa ña̱ plata ini costa ta̱ Benjamín, ta ni̱ka̱ʼa̱nra ta̱yóʼo i̱xakuíʼnaña. Tá nda̱ni̱ʼí na̱ káchíñu nu̱ú ta̱ José copa yóʼo ini costa ta̱ Benjamín nda̱kanda̱ní-inina. Ta ki̱xaʼá xákundáʼvina nu̱ú ta̱ José ná kǒo taxira castigo ndaʼa̱ ta̱ Benjamín chi va̱ʼaka miína ná taxira castigo ndaʼa̱.

Xíʼin ña̱yóʼo na̱kunda̱a̱-ini ta̱ José ña̱ xa̱a̱ na̱samavana. Kǒo níkundeéka-inira ta ki̱xaʼára xákura, ta ni̱ka̱ʼa̱nra: “Yi̱ʼi̱ kúú ta̱ José ñanindó. ¿Á tákuka yivái̱?”. Nda̱kanda̱ní-inina xíʼin ña̱yóʼo. Ta ni̱ka̱ʼa̱n ta̱ José: “Va̱ása chika̱a̱ ku̱a̱chindó miíndó xa̱ʼa ña̱ ke̱ʼéndó xíʼi̱n, chi mií Ndióxi̱ kúú ta̱ chi̱ndaʼá yi̱ʼi̱ ña̱ va̱ʼa chindeíi̱ ndóʼó. Soo kúaʼanndó xa̱ʼa yivái̱, kamaní koondó.”

Na̱ ñani ta̱ José ku̱a̱ʼa̱nna natúʼunna xíʼin yivána, ta nda̱kiʼinnara va̱xira xíʼinna chí ñuu Egipto. Ku̱a̱ʼání ku̱i̱ya̱ ni̱ya̱ʼa, ta nda̱a̱ vitinví ndakutáʼan ta̱ José xíʼin yivára.