Kema José tsaktoya, faraón, katli tlanauatiyaya Egipto, kitemijki se tlamantli tlen amo aka ueliyaya kiixtomilia. Uajka se itekipanojka kiiljuik: “José uelis mitsiljuis tlake kiijtosneki tlen tijtemijki”. Faraón nimantsi tlanauatik ma kiualikakaj José.

Nopa tlanauatijketl kitlajtlanilik: “¿Uelis tinechiljuis tlake kiijtosneki tlen nijtemijki?”. Uan José kinankilik: “Chikome xiuitl onkas miak tlakualistli, uan teipa onkas se ueyi mayantli tlen uejkauas chikome xiuitl. Xijtlapejpeni se tlakatl katli tlalnamiki ma kiajokui tlakualistli, kiampa maseualmej amo mayankamikisej”. Uajka faraón kiiljuik: “¡Ta nimitstlapejpenia! Ta nojkia titekichiuas ipan Egipto”. ¿Kenke José kimatki tlake kiijtosnekiyaya tlen kitemijki faraón? Pampa Jehová kipaleuik.

Ipan chikome xiuitl José kinechikok tlakualistli. Teipa, kampa ueli onkak mayantli, kej José kiijtojtoya. Miakej maseualmej tlen kampa ueli euayayaj kiitatoj José pampa kinekiyayaj ma kinnamakilti tlakualistli. Jacob kimatki ipan Egipto onkayaya tlakualistli, yeka kintitlanki matlaktli ikoneuaj ma kikouatij tlen kikuaskiaj.

Jacob ikoneuaj kiitatoj José. Kema José kinitak nima kinixmatki, uan inijuantij amo kiixmatkej. Uajka iikniuaj motlankuaketskej iixpa kej José kitemiktoya kema eliyaya telpokatl. José kinekiyaya kimatis tlaj iikniuaj nojua kikualankaitayayaj, yeka kiniljuik: “Inmojuantij inkiitakoj kenijkatsa eltok totlal uan kenijkatsa uelis intechtlanisej”. Inijuantij kinankilijkej: “¡Amo! Tojuantij tieuaj Canaán, tieliyayaj 12 tiiknimej. Se  toikni ya mijki uan nopa teipaejketl mokajki iuaya totata”. Uajka José kiniljuik: “Xijualikakaj inmoikni katli teipaejketl uan uajka kena niinmechneltokas”. Teipa José iikniuaj tlakuepilijkej ininchaj.

Kema Jacob ichampoyouaj ayokmo kipixtoyaj tlakualistli, Jacob sampa kintitlanki ikoneuaj ma yakaj Egipto. Uan nojkia kiuikakej ininikni Benjamín, katli eliyaya teipaejketl. José kinekiyaya kiitas tlaj iikniuaj moyolpatlatoyaj, yeka ichtakatsi kitlalik icopa tlen plata ipan ikoxtal Benjamín uan kiniljuik inijuantij kiichtekilijtoyaj. Kema José itekipanojkauaj kipantijkej nopa copa ipan ikoxtal Benjamín, iikniuaj mosentlachilijkej. Kiiljuijkej José amo ma kitlatsakuilti Benjamín, kiiljuijkej ma kintlatsakuilti inijuantij.

Kiampa José kimatki iikniuaj nelia moyolpatlatoyaj. José ayokmo uelki kiijiyouik tlen kiyolmatiyaya, uan pejki mochokilia, kiniljuik: “Na niinmoikni José. ¿Nojua itstok notata?”. Iikniuaj tlauel momajmatijkej. Uajka José kiniljuik: “Amo ximokuesokaj pampa innechnamakakej. ToTeotsij nechtitlanki nikaj para axtimikisej. Nimantsi xiakaj uan xijualikakaj notata”.

José iikniuaj tlakuepilijkej ininchaj uan kiiljuitoj inintata tlen panotoya, uan kiuikakej Egipto. José uan itata miak xiuitl amo moitstoyaj, uan sampa mopantijkej.