Keman José tsaktoya, faraón, akin tekiuajtia Egipto, kikochitak seki taman tein amo akin uelia kiajsikamatia. Se itekitikauj faraón kiluij ke José ueliskia kiluis toni kijtosnekia. Yejua ika faraón tanauatij maj niman kiuikilianij José.

Faraón kitajtanij: “¿Uelis tinechiluis toni kijtosneki tein nikochitak?”. José kinankilij: “Itech altepet Egipto onkas miak takual chikome xiuit, uan satepan onkas mayan chikome xiuit. Xikixpejpena aksa akin tamatkej maj kisentili takual uan ijkon taltikpakneminij amo momikiliskej”. Faraón kiluij: “¡Nimitsixpejpena tejua! Tejua tiyeski ojpatika takat akin okachi ueyichiujkej nikan Egipto”. Sayoj ke ¿keniuj kimatik José toni kijtosnekia tein kikochitak faraón? Jiova kipaleuij.

José kisentilij takual chikome xiuit. Satepan, peuak onka mayan itech nochi taltikpak, kemej kijtojka. Taltikpakneminij noyampa ualayaj kikouilikij takual. Ipopaj, Jacob, kimatik ke onkaya takual itech altepet Egipto uan yejua ika kintitanik ompa 10 ikoneuan maj no kikouatij.

Ikoneuan Jacob kiitatoj José, uan yejua niman kinixmatik. Sayoj ke iikniuan amo kiixmatkej. Moixpilojkej iixpan José, ijkon kemej yejua kikochitaka keman katka telpoch. Kemej kinekia kimatis ox kitauelitayajok, kiniluij: “Namejuan nantapijpianij uan nankiitakoj kanikauin uelis nankalakiskej itech toaltepeuj”. Yejuan kinankilijkej: “¡Amo titapijpianij! Tikayomej Canaán. Tikatkaj 12 tiiknimej, sayoj ke  se momikilijya, uan xokoyot yetok iuan topopaj”. José kiniluij: “Xinechualkuilikan nanmokniuj akin xokoyot uan namechneltokilis”. Ompa, mokepkej ichan ininpopaj.

Ichankauan Jacob oksepa amo kipiayajok toni kikuaskej, uan yejua oksepa kintitanik ikoneuan maj yakan Egipto. Axkan kiuikakej Benjamín, ininikniuj akin xokoyot. Kemej José kinekia kimatis keniuj tanemiliayaj iikniuan, kitatij itatayiloni tachijchiuj ika plata itech ikoxtal Benjamín uan kinpantij ke kiichtekilijkej. Keman itakeualuan José kiajsikej itatayiloni itech ikoxtal Benjamín, iikniuan motelmoujtijkej. Kitataujtijkej José maj kintatsakuiltiani yejuan, uan amo Benjamín.

Ijkon José kiitak ke iikniuan mopatakaj. Yejua amo taxikojok, peuak choka uan kijtoj: “Nejua niJosé, nanmokniuj. ¿Yoltokok nopopaj?”. Iikniuan semi kimoujkakakkej. José kiniluij: “Amo ximotajtakoltikan tein nanechchiuilijkej. Dios nechualkuik nikan maj namechmakixti. Sayoj ke ¡ximoijsiuilikan!, xikualkuikan nopopaj”.

Iikniuan José yajkej ininchan kitapouitoj ininpopaj tein kinpanok uan kiuikakej Egipto. Satepan ke panokej miak xiujmej, José uan ipopaj oksepa moitakej.