Jasefa painga ari mu kadheya, Faro, mambo wo ku Ejipita wakarota hope jokuti apana wakakwanisa kujisanangura. Umwe wo vashandiri vake wakabvunja Faro kuti Jasefa anokwanisa kudurujira revo yo hope jenyu. Ngo kukasika Faro wakadanija Jasefa.

Faro wakamubvunjisa kudari: ‘Ungasanangura hope jangu?’ Jasefa wakati kuna Faro: ‘Kunozova no makore manomwe anozoibva maningi zvokuha mu Ejipita, tevere kunozova no makore manomwe o njara. Sananyi muzivi kuti aunganije zvo kuha ngokudaro vandhu venyu avazofi ngo njara.’ Faro wakati: ‘Ndasana iwewe! Unozova mundhu wocipiri anosisira maningi mu Ejipita!’ Jasefa wakazivisa kudini revo ro hope ja Faro? Jehovha wakabesera Jasefa.

Mukati mo makore manomwe akatevera, Jasefa wakaunganija zvokuha zvizinji. Perapo kwakava no njara mu nyika yese, kudari inga Jasefa wainga wakananga. Vandhu vo mativi ese vakaviya ku Ejipita kuti vatenge zvokuha na Jasefa. Baba wake Jakobe vakazwa kuti Ejipita kwainga no zvokuha, ngokudaro vakatuma gumi ro vana vavo.

Vana va Jakobe vakaenda kuna Jasefa, uwo wakavaziva ngo kukasika. Asi ivona avazivi kuziva Jasefa. Vakamugwadamira kudari inga wakarota mu hope jake paainga ari mujaha. Jasefa waida kuziva dangani hama jake jainga jacinja kana kuti haiwa. Ngokudaro iyena wakati kwavari: ‘Imwimwi muri vafei. Munoda kuziva pakarembera nyika yedu.’ Ivona vakati: ‘Haiwa! Tainga tiri 12 tese hama no hama tiri kubva Kanani. Umwe wo hama yedu yakafa zve  munukuna wedu wasara na baba wedu.’ Perapo Jasefa wakati: ‘Viisanyi munukuna wenyu, ndinozotenda zvamuri kunangaro.’ Ngokudaro ivona vakahwirira ku muzi ka baba wavo.

Mbhuri ya Jakobe poyakaperehwa ngo zvokuha, iyena wakatumazve vana vake ku Ejipita. Pa nguva iyi vakaenda pamwepo na Bhejamini, munukuna wavo. Kuti aeje hama jake, Jasefa wakaviga kopo yake yo sirivha mu saku ya Bhejamini perapo wopumbha hama jake kuti jaba. Vashandiri va Jasefa pavakawana kopo mu sako ya Bhejamini, hama jake jakathya maningi. Vakakumbira kuti Jasefa avapanice kusiapo kupanica Bhejamini.

Wari Jasefa waiziva kuti hama jake jainga jacinja. Jasefa aazivi kukwanisa kungwarira mazwiro ake ku mukuvo wakareba. Iyena wakatanga kucema zve woti: ‘Ndiri hama yenyu, Jasefa. Baba wangu vaciri kurarama wari?’ Hama jake jakakahamara maningi. Iyena wakajibvunja kudari: ‘Mucacumba ngo ndava yo zvakashata zvomakandiitira. Mwari wakandituma kuno kuti ndiponese upenyu hwenyu. Waro kasikanyi zve vianyi na baba wangu kuno.’

Ivona vakaenda kumuzi vobvunja baba wavo masoko akanaka aya zve vohwirira Ejipita. Nopapera makore mazinji, Jasefa na baba wake vakasonganazve.