Ííjipdóó, Féro aláahgo naatʼáanii nayiizyeel. Baa nidziizyeelígíí ááhyiłníigi doo łaʼ bił bééhóziní da. Łaʼ Féro bá naalʼaʼí áháłní, Jóseph awáalya góneʼ sidáhígíí éí nisíníyéelígíí yee nił hodoolnih. Féro éí Jóseph bíká ajííłʼaʼ.

Féro éí Jóseph ábijiní: ‘Baa neisíyeelígíí ááhyiłníigi bee shił hólneʼgoósh bííníghah?’ Jóseph éí Féro ííłní: ‘Ííjipgi tsostsʼid nááhaijįʼ chʼiyáán tʼóó ahayóí doo, áádóó bikʼijįʼ tsostsʼid nínáánááhaijįʼ chʼiyáán ádin doo. Áko diné hóyáanii łaʼ nídidííłtéełgo nidineʼé doo dichin bidooghą́ął da.’ Féro ánídooʼniid: ‘Ní nándiiłtı̨́! Ííjipgi shikéédę́ę́ʼ níhólníihgo ándeeshłííł!’ Jóseph éí Féro yaa nayiizyeelígíí ááhyiłníigi haitʼéego bił bééhózin? Jó, Jiihóvah éí Jóseph yee yił hólneʼ.

Jóseph éí tsostsʼid nááhaijįʼ chʼiyáán áłah ádajiilaa. Jóseph ánínę́ęgi átʼéego chʼiyáán ásdįįd. Diné daʼníłtsʼą́ą́dę́ę́ʼ Jóseph yaa hakáahgo chʼiyáán yaa nidayiiłniih. Bizhéʼé Jéíkab éí Ííjipdi chʼiyáán hólǫ́ haʼníigo yidiiztsʼą́ą́ʼ, áko biyeʼ neeznáá yiltʼéego akǫ́ǫ́ chʼiyáán biniyé ajííłʼaʼ.

Áádóó Jóseph baa jíkai, áko Jóseph éí tʼáá íídą́ą́ʼ hánaaí béédahojoosįįd. Ndi hánaaí éí tʼáadoo hwéédahoosįįd da. Baa nidziizyeel yę́ęgi átʼéego, hánaaí hachʼįʼ yaa ádaadzaa. Jóseph éí hánaaí tʼahdii daatsʼí dahojoołá jinízin. Áko ábijiní: ‘Naalchiʼí danohłı̨́įgo díí kéyah bee bichʼįʼ anáhóótʼiʼgi baa nidanohtáh.’  Ńtʼééʼ ádaaní: ‘Ndagaʼ! Nihí yeeʼ 12go tʼááłaʼ haijéʼígíí Kéínandę́ę́ʼ ádeiitʼį. Akéédę́ʼígíí éí nihizhéʼé yił naaʼaash, tʼááłaʼí éí ádin.’ Áádóó Jóseph ání: ‘Nihitsilí akéédę́ʼígíí bił shaa noohkaigo éí tʼáá aaníígóó dahoołneʼ doo.’ Áko hazhéʼé bichʼįʼ aníjookai.

Chʼiyáán bitsʼą́ą́ʼ ánáánásdįįdgo, biyeʼ Ííjipgóó anááyííłʼaʼ. Akéeʼdi hatsilí Bénjamin bił dashdiikai. Áko Jóseph éí hánaaí nabízhnítaahgo, bee ajidlánígíí Bénjamin beʼazis biiʼ nízhdeesʼı̨́ı̨́ʼ. Áádóó hánaaí éí shee daʼnooʼı̨́ı̨́ʼ bijiníigo bikʼi hozhdiiʼą́. Bee ajidlánígíí éí Bénjamin beʼazis biiʼ siʼą́ą́ lá, áko hánaaí yikʼee dadeesyiz. Nihígo atínihílééh, Bénjamin éí dooda daaníigo Jóseph nídayookąąh.

Jóseph éí hánaaí kʼad łah ádaatʼéé lágo baa ákozhniizı̨́ı̨́ʼ. Áko hajííchago hánaaí ábijiní: ‘Shí Jóseph áshtʼı̨́. Shizhéʼéésh tʼah hiná?’ Áko hánaaí tʼóó bił adahóóyóí. Áádóó ábijiní: ‘Díí ádaotʼįįdígíí tʼáadoo bąąh danihíniʼí. Háálá God nihítséedi shiníłʼaʼ, éí yisdánihidoonił biniyé ádzaa. Tsı̨́įłgo shizhéʼé bił shaa nohkááh.’

Áko hazhéʼé bichʼįʼ aníjookaigo, Jóseph tʼah hináá lágo bee bił dahojoolneʼ. Áádóó Ííjipjįʼ bił nijikai. Tʼóó ahayóí nááhaigo índída, Jóseph éí hazhéʼé bił ahéézhdiitʼáázh.