Puetyi Jose ekahi mokaleya, Farao ohamba yo ko Egitu, aloto ondyoi ipuiya okumbuhangununa. Umwe po vaundapi va Farao emupopila okuti, Jose upondola okuhangununa onondyoi mbae. Liwa-liwa Farao atumu okuihana Jose.

Farao emupopila okuti: ‘Upondola okuhangununa ondyoi yange?’ Jose apopila Farao okuti: ‘Mo Egitu mamukala okulia okunyingi mokueenda kuomanima 7, tupu akulandula omanima 7 ondyala onene. Ngotyo, holovona omunthu omunongo metyivili okupaka nawa okulia opo ovanthu vahankhie nondyala.’ Farao emukumbulula okuti: ‘Ove naholovona! Ove mokala omunthu wavali una epondolo mo Egitu!’ Oñgeni Jose etyivila okuhangununa onondyoi mba Farao? Jeova wakuatesileko Jose.

Mokueenda kuomanima 7, Jose aongiya okulia okunyingi. Pahe akuya omanima ondyala, mouye auho, ngetyi Jose apopile. Ovanthu ko nomphangu ambuho, aveya okulanda okulia ku Jose. Tate yae, Jako, eivi okuti ko Egitu kuna okulia, atumu ovana vae 10 opo vakalende.

Ovana va Jako avaende ku Jose, liwa-liwa Jose eveimbuka. Mahi ovakulu vae kavemuimbukile. Ngotyo avaikila konongolo komutwe wae, ngetyi alotele mondyoi yae. Mahi Jose ankho uhanda okunoñgonoka inkha nkhele vemuyele. Evepopila okuti:  ‘Onwe muvalavi. Muhanda okutuluisa.’ Avapopi okuti: ‘Au! Onthue ankho tuna 12 tuatunda ko Kanaa. Umwe puonthue wankhia iya onkhelo yetu wesala na tate.’ Jose evepopila okuti: ‘Etelelei onkhelo yenyi, opo ndyitavele kuonwe.’ Avakondoka keumbo liavo.

Etyi okulia kuapwa, Jako atumu vali ovana vae vakondoke ko Egitu. Pahe avaende no nkhelo yavo Benjamim. Opo alole ovakulu vae, Jose aholeka okopo yopalata mosako ya Benjamim tupu evepopila okuti mueivaka. Etyi ovaumbili va Jose vavasa okopo oyo mosako ya Benjamim, ovakulu vae avatili unene owoma. Avaiti ku Jose opo vakale polukalo lwa Benjamim.

Pahe Jose anoñgonoka umwe okuti ovakulu vae ankho vapiluluka. Ngotyo Jose eheliholeka vali. Ahimbika okulila, apopi okuti: ‘Ame Jose, ndenge yenyi. Tate nkhele una omuenyo?’ Ovakulu vae avahuvu unene. Evepopila okuti: ‘Muhelivelei onombei mokonda yetyi muandingile. O Huku wanthuma opo ndyihupise omienyo vienyi. Pahe kuluminyei kapolei tate.’

Avakondoka keumbo liavo, avapopila atyiho tate yavo tupu avemutuala ko Egitu. Konyima yomanima omanyingi, Jose na tate yae pahe avakala vali kumwe.