Juk kutim, Josë carcelchö këkaptin, Egiptupa reynin faraonpa suëñunta pipis entiendita puëdirqantsu. Peru faraonpa juk sirweqninmi willarqan Josëqa entiendita puëdinqanta. Tsëmi Faraonqa mandakurqan Josëta pëman apayänampaq.

Faraonqa, “¿imanirtaq këkunata suëñurqö?” nirmi tapurqan. Tsënam Josëqa kënö nirqan: “Qanchis watapam Egiptuchö alläpa mikï kanqa, y tsëpitaqa qanchis watapam mallaqë kanqa. Juk yachaq nunata akrë mikïkunata shumaq guardanampaq, tsënöpa nunakuna mallaqëpita mana wanuyänampaq”. Faraonnam kënö nirqan: “¡Noqaqa qamtam akraq! Y noqapa qepämanqa qammi Egiptuchö mas puëdeq kanki”. Peru ¿imanirtaq Josëqa musyarqan faraon suëñunqan imata rikätsikunqanta? Jehovä yanapashqa kaptinmi.

Josëqa qanchis watam mikïkunata guardar karqan. Y tsëpitaqa pë willakunqannöllam më tsëchö alläpa mallaqë karqan, y nunakunaqa më tsëpitam mikïta ranteq chäyaq. Papänin Jacobpis Egiptuchö mikï kanqanta musyarirmi chunka wamrankunata kacharqan.

Jacobpa wamrankunaqa Josëmanmi chäriyarqan. Peru Josë kanqantaqa manam musyayarqantsu. Y jövin këkar Josë suëñunqannöllam puntanman qonqurikuyarqan. Peru ¿jinallaraqtsuraq chikipäyarqan? Tsëta musyanampaqmi Josëqa kënö nirqan: “Qamkunaqa musyapakoqkunam kayanki, tsëmi këchö nunakuna imanö kayanqanta musyapakoq shayämurqunki”. Tsënam kënö niyarqan: “¡Manam musyapakoqkunatsu kalläyä! Noqakunaqa Canaan sitiupitam kayä, y 12 wawqikunam kayarqä. Jukqa wanukushqanam, y ultimu kaqqa papänïkunawanmi quedakamushqa”.  Josënam, “creiyänaqpaqqa ultimu kaq wawqikikunataraq apayämï” nirqan. Tsënam papäninkunapa wayinman kutikuyarqan.

Jacobpa familianqa yapëmi mikïta pishipakuriyarqan, tsëmi Jacobqa wamrankunata yapë Egiptuman kacharqan. Y tsë kutichöqa ultimu kaq wawqinkuna Benjaminta pusharkurnam ëwayarqan. Tsëmi wawqinkunata probëta munar Josëqa pläta metalpita rurashqa cöpanta Benjaminpa costalninman yakarkurqan, nïkurmi “qamkunam suwapayämarqunki” nishpa wawqinkunata tumparqan. Y Josëpa sirweqninkuna tsë cöpata Benjaminpa costalninchö taririyaptinqa, chipyëpa mantsakashqam wawqinkuna quedariyarqan. Tsëmi Benjaminta castiganampa rantin kikinkunata castiganampaq rogakuyarqan.

Tsëchömi Josëqa cuentata qokurirqan wawqinkunaqa unënönatsu kayanqanta. Y aguantëta manana puëdirmi waqar qallëkurqan, y kënömi nirqan: “Noqaqa wawqikikuna Josëmi kä. ¿Papänïqa kawëkanraqku?”. Wawqinkunaqa espantashqam quedariyarqan. Peru Josëqa kënömi nirqan: “Ama mana allita rurayämanqëkipita llakishqa sientikuyëtsu. Porqui qamkunata salvayänaqpaqmi Diosqa këman chätsimashqa. Antis ¡jinan höra ëwar papänïta këman apayämï!”.

Josëpa wawqinkunaqa kushishqam kutikuyarqan, y tsë alli noticiatam papäninkunata willayarqan, nïkurmi Egiptuman pushayarqan. Y mëtsika tiemputam Josëqa papäninwan tinkurirqan.