José prezupi cajpimi Egiptota mandaj faraonca pi mana huillai tucuipaj muscuicunata muscurca. Faraonta sirvijca, ‘Josemi muscuicuna ima nisha nishcata huillai tucunga’ nircami. Chaimi Joseta utca pushamugrichun cacharca.

Ña chayamujpica faraonca, ‘ñuca muscushcacuna imata nisha nishcata huillai’ nircami. Chaimi Joseca, ‘Egiptopica 7 huatacunatami achca granocuna pꞌucunga. Chai qꞌuipaca 7 huatacunatami jatun yaricai tiyanga. Gentecuna yaricaihuan ama huañuchunca granocunata huaquichichun yachaj runatami agllana cangui’ nircami. Chaimi faraonca, ‘cantami agllani. Ñucapaj qꞌuipaca canmi tucui Egiptopi mandangui’ nirca. ¿Joseca ima shinataj muscuicuna ima nisha nishcata yacharca? Jehovami paitaca ayudarca.

Joseca 7 huatacunatami granocunata huaquichirca. Qꞌuipaca pai nishca shinami tucui ladocunapi yaricai tiyarca. Chaimi gentecunaca tucui ladocunamanta granocunata randingapaj shamurcacuna. Josepaj yaya Jacobpish Egiptopi micuna tiyajta uyashpami paipaj 10 churicunata randinaman cacharca.

Egiptoman chayajpica Joseca chai ratomi paicunata rijsirca. Pero paipaj huauquicunaca mana rijsircacunachu. Huambraraj cashpa José muscushca shinami paipaj ñaupajpi cumurircacuna. Joseca huauquicuna paita pꞌiñashpa catijta yachangapajmi, ‘cancunaca cai llajtata purij shinalla ricujcunami canguichij’ nirca. Paicunaca, ‘mana cai llajtata ricujcunachu canchij. Canaanmantami canchij. 12 huauquicunami carcanchij. Shujca ñami huañurca, último  huauquica yayahuanmi saquirirca’ nircacunami. Chaipimi Joseca, ‘cancunapaj último huauquita pushamujpimi cancunata crisha’ nirca. Qꞌuipaca yayapaj huasimanmi tigrarcacuna.

Jacobca micuna tucurijpimi paipaj churicunataca cutin Egiptoman cacharca. Paicunaca Benjaminta pushashpami rircacuna. Joseca paipaj huauquicuna cambiashcata yachangapajmi cullqui copata Benjaminpaj sacopi churashpa, paicuna shuhuashcata culparca. Joseta sirvijcuna cullqui copata Benjaminpaj sacopi japijpimi paipaj huauquicunaca achcata mancharinacurca. Chaimi Josetaca Benjaminta castiganapaj randica ñucanchijta castigapai nishpa rogarircacuna.

Paipaj huauquicuna cambiashcata ricushpami Joseca mana ahuantashpa huacai callarirca. ‘Ñucaca cancunapaj huauqui Josemari cani. ¿Yayaca causacunrajchu?’ nirca. Paicunaca achcatami mancharircacuna. Chaipimi Joseca, ‘ñucata cꞌatushcamantaca ama llaquirichijchu. Cancunata quishpichingapajmi Diosca ñucata caiman cacharca. Cunanca utca yayata pushamugrichij’ nirca.

Josepaj huauquicunaca huasiman tigrashpami alli huillaicunata yayaman huillarca. Jacobta Egiptoman pushajpimi achca huatacuna qꞌuipa Joseca paipaj yayahuan tupanacurca.