Egiptopi reykunatan faraón nispa niqku. Carcelpi José kashaqtinmi faraonqa mosqokuran, manataqmi pipas mosqokusqanta entienderanchu. Jujnin kamachinmi faraonman willaran mosqokusqanta José explicay atisqanta. Chaymi kamachiran Joseta apamunankupaq.

Jinan faraonqa tapuran: “¿Explicawankimanchu mosqokusqay imachus significasqanta?”, nispa. Jinan Joseqa niran: “Egiptopin qanchis wata askha mijuykuna kanqa, chaymantataq qanchis wata yarqay kanqa. Yachaysapa runata maskhay mijuykunata juñunanpaq, chhaynapi runakuna yarqaymanta mana wañunankupaq”, nispa. Jinan faraonqa niran: “¡Qantan ajllayki! Qanmi noqaman qatimuq autoridadniyoq runa kanki”, nispa. ¿Imaynapin José yacharan faraonpa mosqokusqan imachus significasqanta? Jehová Diosmi yanaparan.

Qanchis watantinmi Joseqa mijuykunata juñuran. Chay qhepamanmi mundontinpi yarqay karan, jinan waj llaqtakunamanta runakuna mijuyta rantiq jamuranku. Jacobqa uyarisqan Egiptopi mijuykuna kasqanta, chaymi chunka wawankunata kacharan mijuyta rantimunankupaq.

Paykunaqa Josepa kasqanmanmi riranku, Josetaq kaqpacha reqsiruran, hermanonkunan ichaqa mana reqsirankuchu. Jinan paypa ñaupaqenpi k’umuykuranku. Joseqa yachaytan munaran payta cheqnikushankuraqchus icha manachus chayta, chaymi paykunata probananpaq niran: “Qankunaqa llaqtaykuta qhawaqmi jamushankichis”, nispa. Jinan paykunaqa kutichiranku: “¡Manan señor! Noqaykuqa Canaán llaqtamantan kayku, 12 hermanokunan  kayku. Jujninmi ichaqa wañupunña, sullk’aykutaq papaykuwan qhepamun”, nispa. Josetaq niran: “Sullk’aykichista apamuqtiykichismi creesaykichis”, nispa. Chay qhepamanmi paykunaqa papankuq wasinman kutipuranku.

Jacobpa familianqa jujmantan yarqaypi kapuran chaymi wawankuna Egiptota kutiranku. Chay kutipin ichaqa Benjaminpas riran. Jinan Joseqa hermanonkunata probananpaq qolqemanta copanta Benjaminpa costalninpi pakaran, jinaspa paykunata niran: “Copaytan suwawankichis”, nispa. Copanta Benjaminpa costalninpi tariqtinkun hermanonkunaqa mana imanakuyta atirankuchu. Josetan valekuranku Benjaminpa rantinpi castigasqa kanankupaq.

Chaypin Joseqa yacharan hermanonkuna cambiapusqankuta. Manaña aguantakuspataq waqaran, nirantaq: “Hermanoykichis José kashani. ¿Papay kausashanraqchu?”, nispa. Jinan hermanonkunaqa anchata admirakuranku. Nillarantaqmi: “Amaña juchachakuychischu. Diosmi kayman apamuwaran vidaykichista salvanaypaq. ¡Usqhayta papayta kayman apamuychis!”, nispa.

Jinan hermanonkunaqa papankuman kutispa willaranku chay sumaq noticiata, jinaspa papankuta Egiptoman aparanku. Unay tiempomantan Joseqa papanwan kuska kapuranku.