José carcelpi cajpica Egiptopi mandaj faraonga pipash na intindinalla muscuitami muscurca. Chaimi faraonda sirvij shuj jarica, Josemi chai muscuitaca intindichita ushan nishpa villarca. Chaimi faraonga Joseta uchalla apamuichi nirca.

Faraonga cashnami nirca: ‘Shuj muscuitami charishcani. Chai muscui ima cajta villahuai’ nishpa. Shina nijpimi Joseca nirca: Egiptopica ‘canchis huatacamanmi granocuna ninanda fucunga’. Cutin ‘canchis huatataca yarjaimi tianga’. Cai llactapi gentecuna ama yarjai pasachun, granocunata alichichun alipacha yachajushca runata agllana cangui nishpa. Chaimi faraonga nirca: ‘Canmi, ñuca huasipi mandangui. Ñuca mandangapaj tiarinapi tiajushcamandallami, candaca yali casha’ nishpa. Shinapash faraón muscushcataca ¿imamandata Joseca yacharca? Jehová Dios ayudajpimi chai muscuicuna ima cajta yacharca.

Joseca 7 huatacunatami granocunata alichijurca. Jipamanga José villashca shinami yarjai tiempo chayamurca. Chaimi tucui ladomanda gentecuna granocunata randingapaj Egiptoman rinajurca. Chaipi ashtaca granocuna tiajta yachaj chayashpami Josepa Taita Jacobca paipa churicunamanda 10puracunata Egiptopi granocunata randichun cacharca.

Jacobpa churicunaca Joseta ricungapami rirca. Joseca paicunataca ñapashmi rijsirca. Shinapash Josepa huauquicunaca paitaca na rijsircachu. Chaimi José joven cashpa muscushca shina paipa ñaupajpi urai cumurinajurca. Joseca paipa huauquicuna cambiashcata o na cambiashcata yachangapaj munashpami cashna nirca: “Cangunaca, pacalla ricuchun cachamushcacunami canguichi. Cai llacta maipilla na jarcashcata ricungapajllami shamushcanguichi” nishpa. ‘Chaimi paicunaca cashna nirca: Na shinachu capan, canda sirvijcunaca 12 huauquicunami caparcanchi’. Canaán llactapi causajuj shujlla taitapa churicunami capanchi. Último churica cunanga ñucanchi taitahuanmi, shujca ña huañushcami. Shina nijpimi Joseca cashna nirca: “Cangunapaj jipa huauqui caiman shamujpillami”  cangunataca crisha. Chaimi paicunaca cutin taitapaman tigrarca.

Jacobpa familia grano illaj quedajpimi, Jacobca paipa churicunata cutin Egiptoman randichun cacharca. Cai viajeca paipa último huauquitami pushashpa rirca. Joseca paipa huauquicuna imashina cajta yachangapami paipa culqui copata Benjaminba grano costalpi churashpa, paicunataca shuhuashcanguichi nishpa juchachirca. Joseta sirvijcunaca Benjaminba costalpimi Josepa culqui copata tarirca. Chaita ricushpami Benjaminba huauquicunaca ninanda manllarishpa Josetaca cashna nirca, ñucanchita cashtigailla pero Benjamindaca ama imatapash rurapaichu nishpa.

Chaimi Joseca paipa huauquicuna ña cambiashcata ricushpa Joseca ninanda huacashpa cashna nirca: Ñucaca cangunapaj huauqui Josemi cani. “¿Ñuca taitaca causajupanrachu?” nishpa. Chaimi paipa huauquicunaca ninanda manllarirca. Shinapash Joseca nircami: ‘Na llaquirinachu canguichi. Ñucata caiman jatumushcamandapash na fiñanajunachu canguichi. Cangunata causaihuan charingapami Taita Diosca caiman cachamuhuarca’. Cunanga ‘ucha rishpa ñuca taitata caiman pushamugripaichi’ nishpa.

Shinami Josepa huauquicunaca taitaman ima pasashcata villangapaj rirca. Villashca jipallami Egiptoman paicunapa taitata pusharca. Shinami ashtaca huatacuna yalishca jipa Joseca paipa taitahuan cutin tuparirca.