Dži o Josif hine ko phanljipe, o faraon, o vladari ando Egipat, dikhlja sune. Ama, niko naštindža te vačeri ljese so on značinena. Jekh ando oljese sluge phendža e faraonese so o Josif šaj te phenel ljese so značinena o sune kola dikhlja. O faraon phendža odmah te vičinen e Josife.

O faraon pučlja lje: „Šaj li te objasnine maje so značinena o sune kola dikhljum?“ O Josif phendža e faraonese: „Ko Egipat efta berš ka ovel but habe, a palo odova efta berš ka ovel baro bokhaljipe. Birin jekhe godžalje manuše kova ka čedel but habe, adžahar na ka meren o manuša ando bokhaljipe.“ O faraon phendža: „Tut birinava! Tu ka ove o dujto najmoćno manuš ko Egipat.“ Kotar džandža o Josif so značindže e faraonese sune? O Jehova pomožindža lje te džanel.

Adžahar, o Josif efta berš čedindža habe. Ked nakhlje odola efta berš, ki celo phuv hine bokhaljipe, baš sar so phendža o Josif. O manuša ando razna thana alje te činen habe e Josifestar. Ked oljeso dad, o Jakov, šundža so isi habe ko Egipat, bičhaldža peklje dešen čhaven te džan hem te činen habe.

Ked e Jakovese čhave dželje ko Josif, ov odmah pendžardža ljen. Ama, oljese phralja na pendžardže lje. On poklonindže pe oljese baš adžahar sar so o Josif dikhlja ko suno ked hine poterno. O Josif manglja te džanel da li tane oljese phralja pana lošna. Odoljese phendža ljendže: „Tumen hijen špijunja. Mangena te dikhen kuri amari phuv nane zaštitimi.“ On phendže: „Na, nane adžahar! Amen hijam 12 phralja ando Hanan. Jekh amaro phral  mulo, a o najtikneder ačhilo čhere amare dadeja.“ Tegani o Josif phendža ljendže: „Anen tumare najtiknedere phralje akate hem ka verujinav tumendže.“ Tegani on irindže pe čhere ko po dad.

Ked e Jakovesi porodica ačhilji bizo habe, ov paljem bičhaldža pe čhaven te džan ko Egipat. Ama, akava puti, ljelje peja e najtiknedere phralje, e Venijamine. O Josif manglja te dikhel da li oljese phralja menindže pe. Odoljese phendža te čhiven oljesi srebreno čaša ki e Venijaminesi torba kaj hine dživ. Palo odova, ov phendža so on čordže la. Ked e Josifese sluge arakhlje i čaša ki e Venijaminesi torba, oljese phralja naštindže te verujinen. Tegani počmindže te molinen e Josife te kaznini oljen, a na e Venijamine.

O Josif dikhlja so oljese phralja menindže pe. Ov naštindža više te izdržini. Počmindža te rovel hem phendža ljendže: „Me hijum o Josif, tumaro phral. Da li tano mo dad pana dživdo?“ Oljese phralja hine but iznenadime. Odoljese phendža ljendže: „Ma oven tužna odoljese so odova čerdžen maje. O Devel andža man akate te šaj te spasini tumen. Akana, sigate džan hem anen me dade akate.“

On irindže pe čhere hem vačerdže pe dadese sa so ulo hem sarine zajedno dželje ko Egipat. Palo but berša, o Josif hem oljeso dad paljem hine zajedno.