Na ngoi so Joseph ayeke na da ti kanga, Pharaon, gbia ti Égypte, abâ li ti lo, na zo oko alingbi ti fa ndani ape. Mbeni oko ti azo ti kua ti Pharaon atene na lo so Joseph apeut ti fa na lo nda ti bango li ti lo ni. Hio, Pharaon atokua ti iri Joseph.

Pharaon ahunda lo, atene: ‘Mo peut ti fa na mbi nda ti bango li ti mbi so?’ Joseph atene na Pharaon: ‘Kobe ayeke si singo na Égypte ngu mbasambala, na pekoni kota nzara ayeke sara ngu mbasambala. Soro mbeni zo so lê ti lo ahan nga so ayeke na ndara ti bungbi akobe na yâ ti agogoro tongaso si azo ti mo akui nzara ande ape.’ Pharaon atene: ‘Mo la mbi soro mo! Mo yeke ga use zo so ayeke kota zo na Égypte!’ Me Joseph asara tongana nyen ti hinga nda ti bango li ti Pharaon so? A yeke Jéhovah la afa ndani na lo.

Joseph abungbi akobe gbani na yâ ti agogoro ndali ti ngu mbasambala so ayeke ga. Na pekoni, kota nzara atï na ndö ti sese kue gï tongana ti so Joseph atene. Azo alondo na ando nde nde ti ga ti vo kobe na maboko ti Joseph. Babâ ti lo Jacob amä so kobe ayeke na Égypte, tongaso lo tokua amolenge ti lo ti koli kâ ti tene ala gue avo mbeni.

Amolenge ti Jacob ague na mbage ti Joseph, na Joseph abâ ala droit lo hinga ala. Me aita ti lo ni ahinga atene Joseph la ape. Ala kuku na gbe ti lo, tongana ti so lo tene na ala na ngoi so lo de kete. Joseph aye ti hinga wala aita ti lo ni angbâ na sioni bibe. Tongaso lo tene na ala: ‘Ala yeke azo ti bembengo ndo! Ala ga ti bâ kodro ni ti hinga mbage so aye ti batango kodro ni ayeke dä pëpe!’ Ala tene na lo: ‘Ên-ën, e kue e  yeke aita 12 na kodro ti Canaan. Mbeni ita ti e oko akui awe, na tanga ti e kue angbâ na terê ti babâ ti e.’ Na pekoni, Joseph atene: ‘Ala ga na tanga ti ita ti ala ni ge, tongaso si mbi yeda na tënë so ala tene so.’ Na pekoni ala kiri na yanga-da na terê ti babâ ti ala.

Tongana kobe ni ahunzi si nzara akiri asara ala, Jacob atokua amolenge ti lo ti kiri na Égypte. Ti so ni so, ala mû Benjamin, tanga ti ala, ala gue na lo. Ti tara aita ti lo, Joseph ahonde kopo ti lo ti argent na yâ ti sac ti alê ti kobe ti Benjamin nga na pekoni lo tene so a yeke ala la si anzi ni. Tongana azo ti kua ti Joseph awara kopo ti argent ni na yâ ti sac ti Benjamin, li ti aita ti lo akpe. Ala voro terê ti ala na Joseph ti tene lo punir ala na place ti Benjamin.

Fadeso, Joseph ahinga biani so aita ti lo achangé awe. Joseph apeut ti kanga bê ti lo aninga encore ape. Lo tï na kota toto na lo tene: ‘Mbi yeke ita ti ala Joseph. Babâ ti mbi angbâ na fini?’ Bê ti aita ti lo adö. Lo ngbâ lo tene na ala: ‘Ala gi bê ti ala ape ndali ti ye so ala sara na mbi lani so. Nzapa atokua mbi ge ti sö fini ti ala. Ala gue hio amû babâ ti mbi aga na ni.’

Ala kiri na yanga-da ti tene na babâ ti ala nzoni sango so, nga ti mû lo ti ga na lo na Égypte. Na peko ti angu mingi so ahon, Joseph na babâ ti lo akiri awara terê.