Yooseefi usuru mine heeˈreenna Gibitsete moote Feriooni haaqee haaqiiˈri; tenne haaqee mittu manchino tira hoogino. Mittu Feriooni soqqamaasinchi Yooseefi haaqeesi tira dandaannota kulisi. Feriooni hakkawontenni Yooseefi woshshe abbisiisi.

Feriooni Yooseefi, ‘Haaqiiˈroommo haaqee tira dandaatto?’ yee xaˈmisi. Hakkiinni Yooseefi Feriooni togo yii: ‘Gibitsete gobbara lamala diro sagale batidhanno; hakkunni gedensaanni kayinni lamala diro hude batidhanno. Mannikki reye goofannokki gede, gide gamba assannoha hayyicha mancho doori.’ Hakkiinni Feriooni togo yii: ‘Ate dooroommohe. Ati Gibitsete gobbara layinki moote ikkatto!’ Yooseefi Feriooni haaqiiˈrino haaqee tiranno gede kaaˈlinosihu ayetiro afootto? Yihowaati.

Hakkiinni Yooseefi lamalu diri giddo gide gamba assi. Hakkunni gedensaanni Yooseefi coyiˈrinonte gede uulla woˈmate aana hude batidhu. Mannu base baalatenni Yooseefiwa sagale hidhara dayi. Yooseefi anni Yaiqoobino Gibitsete gobbara sagale noota macciishshe sagale hirtara tonne oososi soyi.

Yaaiqoobi ooso Yooseefiwa martuta Yooseefi insa ayeootiro bayichonko afi. Roduuwisi kayinni isi Yooseefi ikkinota diaffino. Yooseefi wedellichu heeˈre haaqiiˈrino garinni roduuwisi umonsa heeshshi assite ayirrissusi. Yooseefi roduuwisi bunshe agurtinoronna teˈee afa hasiˈri. Konni daafira togo yiinsa: ‘Kiˈne qotaanote. Gobbankera mayi xeinoro laˈine hadhinara dagginoonni.’ Hakkiinni insa togo yitu: ‘Deeˈni! Ninke Kanaani gobbanni dangoommo roduuwaati, ninke anninkera tonaa lameho. Mittu rodiinke reyino, maaˈniidihu kayinni mine anninke  ledo no.’ Hakkiinni Yooseefi togo yiinsa: ‘Coyidhinoonniri adda ikkinota ammaneemmo gede, hadhine maaˈne rodooˈne anewa abbe.’ Konni daafira, insa anninsawa qaera higgu.

Yaaiqoobi minensa sagale gooffuta xaano oososi Gibitsete gobba soyi. Hatte yannara insa maaˈniidi rodoonsa Biiniyaami haadhe hadhino. Yooseefi giddonsata afara yee, Biiniyaami gide wodhara adhe haˈrino ogori giddo birrunni seekkinoonni finiinchosi wori; hakkiinni roduuwasi, ‘Finiinchoˈya moortinoonni’ yiinsa. Yooseefi soqqamaasine finiinchosi Biiniyaami ogori giddo affuta, roduuwisi lowo geeshsha masse huxidhu. Hakkiinni insa Yooseefi Biiniyaami agure insa qorichishanno gede huuccidhu.

Xa Yooseefi, roduuwisi bashsho gede bushuulle ikkitinokkita huwati. Hakkiinni Yooseefi cinca hooge hururame wiˈli. Isi togo yiinsa: ‘Ani rodooˈne Yooseefiiti. Anniˈya xaa geeshsha lubbote no?’ Roduuwisi masse jalli yitu. Yooseefi togo yiinsa: ‘Hirtinoonnie daafira dadillitinoonte. Maganu lubboˈne gattanno gede kawiira soyinoe. Xa rakkine annaˈya anewa abbe.’

Insa qaera hadhe anninsara Yooseefi lubbote noota kultusi; hakkiinni annansa haadhe Gibitsete gobba hadhu. Lowo diri gedensaanni Yooseefi annisi ledo galagale xaadi.